MNF sorkartir turin mipui sáwm

MNF adviser Dr R Lalthangliana chuan nimin zing khan Hlimen YMA Hall, Saikhamakawn, Tlangnuam Vengthar leh Kulikawnahte vantlang inkhawmah thu sawiin, Aizawl khawpui hmasawn nan AMC-ah MNF sorkartir ngei turin mipui a sáwm.

Dr R Lalthangliana chuan, Covid-19 lakah khawvel ram ropui ber ber thlenga an tlàwm laiin Mizoram chu mualpho lutuk loin a awm thei tih sawiin, "Theihtawp tak meuh kan chhuah a, kan thawhhona a ṭha a, Pathianin mal min sàwm a ni," a ti.

MNF Adviser chuan, AMC chu kum 1998-2008 inkara MNF sorkar laia din a nih thu sawiin, "AMC hi MNF din leh kutchhuak a ni. A dintu MNF hian AMC kalphung leh nihphung a hria a, AMC awm dan tur chu a hre chiang ber. State-ah Pu Zoramthanga kaihhruai a sorkar mek tih hria ila, ruahmanna a siam thiam ang tih ring ngam ang u," a ti.

Nimin vêk khan Mission Vengthlanga vantlang inkhawm chu MNF adviser Lalruatkima'n a hmanpui a; state sorkar tel loin AMC chak a neih theih loh nia sawiin, "AMC hi amahin a kal thei lo a, naupang kaih ngai, chaw la pek ngai ang a ni. Tihchangtlun a ngaihna leh thuam chak a ngaihna kawng tam takah a awm. State sorkarin AMC hi a kaih a, chaw a barh a ngai a, sorkar tel loin AMC chak kan nei thei lo ang," a ti a; AMC kàia chaw barhtu tur state sorkar nen an thawh dun a ṭul thu a sawi.

Inkhawmah hian L Thangmawia, MLA leh AMC Ward-XIV atana MNF candidate Lalrinpuii te pawhin thu an sawi a ni.