Municipal Act kan neih mek hi Hnam tan a him lo - Lalduhoma

ZPM leader Lal­duhoma chuan nimin khan AMC Ward-II ZPM campaign office a hawng a; Municipal Act hman mek chu Mizo hnam tan a him loh thu a sawi.

Lalduhoma chuan, MNF-te'n 'Municipal hi kan fa hrin a ni, kan ta a ni. A neitu ngei hi min thlang rawh u' tia an au thu sawiin, "Municipal chungchanga Assembly House-a bill pu lut hmasa ber chu khatih hunlaia ZNP-te kha kan ni a, MNF-te hi an ni lo. MNF sorkar hian duh loin min hnâwlsak a ni. Mahse, central aṭanga sum lo kal thei kha an ît si avangin neih ve ṭul niin an hria a, a kum leh maiah Assembly House-ah an rawn pu lut leh a ni," a ti.

ZPM Leader chuan, MNF siam Municipal Act chu chhuan tlak leh campaign-pui tlak a nih loh thu sawiin, "Keini tih, kan hnam mila kan siam kha hnâwlin, vai ho siam ang ang la chhâwngin min pass-pui lui a ni.  Bill pass ní pawh khan engtik níah emaw chuan kan la inchhir ang, kan ti nghe nghe. Tuna kan Municipal danah hi chuan sumdawnna kawngah invenhimna kan nei thei lo," a ti a; hmun danga Municipal Act ang tho Mizoramin a neih avangin hnam tan a him loh thu a sawi.

AMC-in hman deuhah Trading Regulations Act an siam tih sawiin Lalduhoma chuan, "Kan hnam tan a him loh avangin sumdawng pawl leh NGO-te'n AMC office hual an tum a, hual an tum níah tak khan AMC kha a tlu ta a nih kha. He municipal-ah hian MNF-te'n an siam dan hi a him loh em avang leh a chhiat em avangin tribal ni lote pawhin vote an nei thei a, an in candidate thei a ni," a ti.

Inkhawmah hian ZPM Legislature Party leader Vanlalhlana leh AMC Ward-II atana ZPM candidate Lalṭhazuala Rawite te pawhin thu an sawi a ni.