Ram leh hnam innghahna lungphûmah Pathian kan hmang - Lalchhandama Ralte

Mizo National Youth Front (MNYF) chuan nimin khan Zemabawk kâwnah Sikpui Fehchhuah an buatsaih chhunzawm a; thusawitu MNF adviser Lalchhandama Ralte chuan, MNF-in ram leh hnam innghahna lungphûmah Pathian an hman thu a sawi.

Lalchhandama Ralte chuan, sorkar liam taa thuneihna chelhtu Congress chu kum 1885-a AO Hume-a te din kha ni loin, kum 1968-69 vela Indira Gandhi din a nih thu a sawi a, "Mizote tana din a ni lo a, Mizote mila din pawh a ni lo. A pianṭo a fuh lo," a ti.

Mizorama Congress president chu mihring danah a kum a tam tawh tih sawiin Lalchhandama chuan, "A thachhang dâwltu tur lam en ila, an vice president chuan rawngbawlna lama inhman zui a duh avangin bànna a thehlut tawh. Vice president nih an inchuh a, an treasurer ni laiin vice president nih tum mah se, solfa vai thiam lo conductor an lo sawi angin an invai bua a ni," a ti a, Congress tan AMC kaihhruai ngaihna a awm lo niin a sawi.

Lalchhandama Ralte chuan ZPM chungchang sawiin, "Kum thum/li vel lek kal taa din a ni a, an pian danah 'Kan sakruang Mizoram tan' tih emaw, 'Khawvel hriat thiama Mizote lantir' emaw lam a ni lo, lalna leh thuneihna duh vanga din, 'MNF ni lo, Congress ni lo' tih avang chauha din a ni. An pianṭo a fuh lo," a ti.

MNF Adviser chuan, ZPM-in president leh leader an neih thu sawiin, "An president nge an leader thu zawk tih hriat a ni lo a, chungte nge thu zawk Val Upa Council tih kan hre lo. Party hrang hrang kal khawm an ni a, nihna invuah khawm chawp an ni," a ti a; Aizawl khawpui khawlpui ni turin ZPM an ṭha ber em tih ngaihtuah turin mipui a sáwm.

MNF chu Mizorama party tlo ber leh upa ber a nih thu sawiin Lalchhandama chuan, "Kumina kum 60-na hmang mek kan ni. Kan Kristianna humhim a nih theih nan an lo din a, 'Pathian leh kan ram tan' tiin bul an ṭan. Kan ram leh hnam innghahna lungphûmah Pathian an hmang a ni," a ti.

Inkhawmah hian MNYF president Lalrinawma leh AMC Ward-III atana MNF candidate Vanlalneia te pawhin thu an sawi a ni.