World Cancer Day hman a ni

February 4, Ningani khan Mizoramah World Cancer Day hman a ni a, thupui chu, 'I am and I will' tih a ni.

World Cancer Day hi Aizawlah chuan National Programme for Prevention and Cancer, Diabetes, Cardiovascular Disease and Stroke (NPCDCS) bultumin Taxation department auditorium-ah hman a ni a; Dr Jeremy L Pautu-in kaihruaiin, NHM mission director Dr Eric Zomawia'n a hmanpui.

Dr Eric Zomawia chuan, cancer ûmbo turin Mizoram sorkarin nasa takin hma a la ṭhin tih sawiin, "Mizorama cancer tam chhan chu zûk leh hmuam kan ti nasa lutuk leh kan ei leh in fimkhur tâwk lo hi a ni a, Mizorama cancer thlentu lian ber chu zuk leh hmuam a ni," a ti.

NHM Mission Director sawi danin, khawvelah cancer vanga thi zawng zawng zinga 20% chu vaihhlo zuk leh hmuam vang a ni. Mizoram chu cancer vei tamna a nih rualin, hmeichhia cancer leh pumpui cancer bikah Arunachal Pradesh chu Mizoram aiin an sanh zawk.

Radiation oncologist Dr Lalhlupuii'n World Cancer Day thupui, 'I am and I will' tih a sawi a; Mizoram State Cancer Institute director Dr Zoremthanga'n Cancer Hospital changtlung zawk nei tura hmalâk dan leh cancer hemna kháwl Radiotherapy machine thar an neih tawh thu a sawi bawk.