Driving licence lem 755 man a ni tawh

Kumin June thla laihâwl aṭang khan Mizoram police-te chuan driving licence lem 755 an man tawh a, 500 vel zet la hmuh chhuah tur a la awmah an ngai. Aizawl SP C Lalzahngoa chuan, sorkar thu neitu (issuing authority) ni lote'n licence leh document lem siama mi tam tak an bumna lakah mipui fimkhur turin a chah.

Mizoram police-a Criminal Investigation Department (CID)-a Special Branch (SB)-te thil chhuina kal zelah driving licence lem tam tham tak a awma hriat a ni a, chumi bawhzui chuan police station-ah FIR thehluh a ni. Police hotute chuan chhui turin Special Investigation Team (SIT) a din a, Aizawl North SDPO Lalringliana Pachuau chu team leader a ni a; SIT-ah chuan inspector pakhat, sub-inspector panga, CID (SB) mi leh traffic police mite an tel.

Police-te sawi danin, driving licence lem siam ṭhina puh JH Lal­­thanmawia (33) s/o J Lalbiak­sanga, Zohmun, Aizawl district, tuna Zuangtui Venga khawsa mek chu police-in an man tawh. 

JH Lalthanmawia hian computer hmangin licence lem a siam a, mi pali hnenah Rs. 500 zelin a leitir a, anni chuan mi hrang hrang hnenah Rs. 1,500-6,000-in an hralh leh ṭhin. JH Lalthanmawia'n licence lem a siam sa leia hralh leh ṭhin­tute chu - Zoremmawia (26) s/o Lal­chungnunga (L), Maubawk, Aizawl leh Zuangtuia awm nia insawi mi pathum - Lalthangmawia (25) s/o H Saichhunga; Lallawmkima (32) s/o Vanlalsawma leh C Lalremruata (34) s/o C Lungtiawia te an ni.

Mi palite chuan Whatsapp group hrang hrangah licence an siamsak theih thu leh, driving test a ngaih loh thu an tlangzarh aṭangin miin an hria a; SIT leader Lalringliana chuan district hrang hrangah pawh an thehdarh viau thu leh state páwna mite hnenah pawh an hralh nia an hriat thu a sawi.

JH Lalthanmawia hi Bawng­kawn Police-te chuan July 17, 2019 khan an man a, Court phalna-in ni nga vel kawlin thu an zawtfiah tawh a, chumi hnuah jail-ah khung a ni. JH Lalthanmawia licence lem siamna hmanrua hi police-te'n an mansak tawh a, eng zat chiah nge a siam tawh tih hre turin enfiah mek a ni. Police hnenah licence lem 1,200 vel a siam tawh angin a insawi a; nimahsela hei aia tam hi a siam an rin thu SIT Leader chuan Vanglaini a hrilh.

Licence lem a ni tih an hriat hnuah Bawngkawn Police Station-a thehlut ta mi eng emaw zat an awm.

Aizawl SP C Lalzahngoa chuan thuchhuah siamin, "Sorkar thuneitu (issuing authority) ni lote'n driving licence leh document lem siamin mipui an bum ṭhin tih hriat a ni a, hetiang thil tih hi dan bawhchhiatna lian tak a ni a, kum sarih thleng lungin tàn leh pawisa chawi theihna a ni. Chutiang document lem leitute leh hmangtute pawh dan anga hrem theih an nih vangin mipuite fimkhur turin kan inhriattir a ni," a ti. Licence lem leitute chu IPC 471 hmangin hrem theih an ni.

•  Chhuitu tur SIT din

•  755 man a ni tawh

•  500 vel man tur la awm

•  A siamtu ber man a ni