Mi kut tuarin Suangpuilawn nu a thi?

August 3, Inrinni zing dar 6 vel khan Hming­­thanzuali (51) d/o Lal­rinmawia (L), Suang­puilawn chu a khumah thichhawnga hmuh a ni a, damdawi-in panpui a nih hnuah a hliam tuar loin a thi. Mi kut tuara thi nia rinhlelh a nih avangin police-in thubuai an ziak lut.

Suangpuilawn aṭanga thu dawn danin, Hming­thanzuali hi a pasal fanaute nena awmho tawh lo, a nute hnena kîr leh tawh a ni. Amah hi dawr siama eizawng a ni a, zing dar 6 velah an ṭhenawmte'n thil lei an duh avangin a chhungte'n an kaitho dawn a, thichhawngin a awm tih hriat chauh a ni.

Suangpuilawn Joint YMA President F Pazawna hnen aṭanga thu dawn danin, a khumah hliam na tak tuara hmuh a nih hnuah, Suangpuilawn damdawi-in panpui nghal a ni a, a hliam a nat avangin Aizawl lam panpui leh nghal a ni.

Aizawl Civil Hospital casualty thlenpui hman ni mah se, an thlenpui hmain a hliam tuar loin a lo thi hman tawh a, nimin khan vui a ni.

Suangpuilawn khuaa YMA leh MHIP hruaitute chuan, Hmingthanzuali thih dan chu pawi an tih thu leh, kutthlaktu man chhuah thuai a nih theih nan police-te'n theihtawp chhuah se an duh thu an sawi. Suangpuilawn Joint YMA President chuan, police-in mi pahnih thu an zawtfiah tawh tih Vanglaini palai a hrilh.