ILP nei lo mante thawn haw an ni
YMA leh police ṭang kawpin August 1, 2019 zana Inner Line Permit (ILP) endik rûnpui an neih a, Aizawl district bika ILP nei lo hnam dang mante chu an khaw lamah thawn let vek an ni tawh.
Aizawl SP C Lalzahngoa sawi danin, ILP endik rûnpuiah hian Aizawl district-a hnam dang man zinga 770 chu August 2, Zirtawpni khan Court-ah hruai an ni a, an zinga 617 chu Court thupek angin, August 2 zanah an awmna Assam lamah thawn kîr nghal an ni.
August 2-a Court-a hruai hman loh Aizawl district chhung thingtlang khaw ṭhenkhata man khawm mi 58 chu August 3, Inrinni khan Court-ah hruai leh an ni a, Inrinni vêk khan an khaw lama thawn haw an ni. Mizorama hnam dang ILP nei loa awm, YMA leh police ṭangkawpin August 1, 2019 zana endik rûnpui an huaihawtah hian ILP nei mumal lo 1,198 man an ni a, chu'ng zinga 858 chu Aizawl district-a awm an ni. Aizawl district-a man ṭhenkhat chu anmahni sponsor-tute'n ILP kenga an lak chhuah lehte an awm bawk.
Aizawl district-ah August 2-3 chhunga Court-a hruai hnua thawn haw zawng chu an vaiin mi 675 an ni a, ILP an neih vanga Court-in a chhuah mi 153 an awm. Thu dawn danin, ILP endik rûnpuiah hian Mamit district-ah ILP nei lo leh hmang dik lo 38, Lunglei district-ah mi 42, Champhai district-ah mi 27, Serchhip district-ah mi 98 leh Kolasib district-ah mi 135 man an ni.