Khaw 3-ah in 3 a chim

August 3, Inrinni zan dar 11:05 khan PC Lal­neihkimi, Bairabi in chu a thlanga Tlawng lui lianin a chîm avangin a chim a, nimin  khan khawtlangin an senghawi.

Zaithanpuii in pawh thlang lam ban innghahna a min tawh avang leh a chhuat a khîk nasat avangin ṭhiah nghal a ni a; MHIP in pawh a chhuat a khîk nasat avang leh a bang thlang lam a khîk nasat tawh avangin vawiinah ṭhiah tum a ni. Chhiatna thlenna hmun hi nimin khan bialtu MLA, minister K Lalrinliana'n a tlawh a, hnatlangte ei leh in senso atan Rs. 3,000 a pe.

Bairabi khuaa Tlawng kam hi kum tin a min ṭhin a, kum 30 chhungin in 55 a minpui tawh. Mizoram sorkar chuan Tlawng kama kum tin leimin ṭhin venna turin project chi hnih a siam mek nia thu dawn a ni. Inrinni zan vek dar 10 vel khan Darlawn Electric Venga T Hnema in pawh a tlu a, in leh a chhunga bungruate a chhe nasa hle; ina cheng awm chhun T Hnema erawh a na lo.

Nimin zing dar 5:30 vel khan Thingdawl Hmar Venga JH Sama-te pafa luah lai in pawh a chim a, mihring thi leh hliam an awm lo.