KHAWTHLIR

Aizawl Traffic SP chuan thupek chhuahin, vawiin, August 5 aṭanga Chanmari West kawipui aṭanga Vaivakawn (Hunthar Veng junction) inkar kawngpui siam hna thawh a nih dawn avangin, hna thawh chhungin lirthei tlân phal a nih dawn loh thu a puang. Traffic SP thupek ang chuan, kawngpui siam zawh a nih hma chuan kawngpuiah hian chawhma dar 10 aṭanga tlai dar 4 inkarah lirthei tlân phal a ni lo a; chhiat­rupna thil, kângmei leh rîkrum thila pawimawh bikte chêtvelna erawh a huam lo.

Inrinni khan Ramthar Veng Branch YMA-in Aizawl Civil Hospital (ACH) tan thisen unit 202 an pe a, petute mipa 180 leh hmeichhia 22 an ni a; Vaivakawn Vengthlang Branch KṬP pawhin ACH Blood Bank-ah thisen unit 20 pein, a petute mipa 16 leh hmeichhia pali an ni. KṬP, Bethlehem North Branch leh Tuithiang Vengchhak Branch-ten Bethlehem North Kohhran Hall-ah Synod Hospital tan thisen unit 37 an pe a, petute mipa 33 leh hmeichhia pali an ni. Beer Seba Group of Institution, Chhinga Veng-in State Referral Hospital-ah thisen unit 25 an pe a, LIKBK Ṭhalai Pawl, Lawng­tlai AOC Pastor Bialin Lawngtlai District Hospital tan thisen unit 28 an pe bawk.

Lunglei District Sports Committee chuan August 3, Inrinni khan Lunglei district mi, India ram pum huap infiamna kawng hrang hranga hmingṭha 17-te chawimawina hun, Lung­lei Cultural Heritage Centre-ah an buatsaih a, Lunglei HPC vice chairman Lawmawma Tochhawng, MLA-in a hmanpui. Boxing, shooting, judo, karate leh sepaktakrow-a national level-a medal late hnenah chawimawina thuchei leh pawisa hlan a ni.

Siaha DC Bhupesh Chaudhary ruahman ang­in, MGNREGS hnuai­ah Jal Shakti Abhiyan beihpui thlakna chi khat atan Inrinni khan thing phun rûnpui buatsaih a ni. Thing phun rûnpui hi MGNREGS hnuai­a thawh a ni a, Tipa RD block hnuaia V/C pathum - Tipa-D, Tipa-V leh Ahmypi huam ­chhunga thawh a ni.