Ṭhalaite an thatchhe ta lutuk hi ramin A tawrh a hlauhawm - R Lalzirliana

Armed Veng Branch YMA chuan August 3, Inrinni khan an kum 50-na, golden jubilee an lawm khârna inkhawm an community centre-ah an buatsaih a; khuallian, minister R Lalzirliana chuan, Mizo ṭhalaite an thatchhe lutuk nia sawiin, chu chu ramin a la tawrh a hlauhawm thu a sawi.

Jubilee khârna inkhawm hi Jubilee Committee vice president K Chalkhuma'n a kaihruai a; R Lalzirliana chuan, Mizo ṭhalai zingah hnathawh tum lo, kum upa zawkte châwm hlàwm an tam thu sawiin, "Ṭhalaite an thatchhiat avang hian kan ramin tunah tuar rih lo mah se, kum 10-20 ah chuan kan ram hi a tlabal hle ang tih a rinawm," a ti.

R Lalzirliana chuan, ṭhalaite thawh hreh nei lo tura fuihin, "Mi dangin min chîmral hi a hlauhawm loh. Thatchhiatna hmangin hnam dang kan inchîmraltir ang tih a hlauhawm," a ti a; ṭhalaite chu châwm hlàwm nih zak turin a chah.

Khualzahawm minister Robert Romawia Royte, bialtu MLA chuan, Armed Veng Branch YMA chuan thil ropui tak tak a tih tawh thu sawiin, "Ram pum huapa YMA branch ropui berte zinga mi in ni. Hruaitu hluite hnu chhui kîrin, intihchakna atan hmang ila, chu chu jubilee hlawhtlinna tur pawh a ni ang," a ti.

Robert Romawia Royte hian golden jubilee lawmpui nan Armed Veng YMA hnenah hian Rs. 1,50,000 leh Taekwondo Fight League khelh zawh taka champion Armed Veng Warriors hnenah Rs. 1,00,000 a hlan a ni. Jubilee lawmnaah hian Central YMA president Vanlalruata pawhin thu sawiin, jubilee puala buatsaih souvenir a tlangzarh. Inkhawmah hian hruaitu hlui 62 chawimawina hlan a ni a, an zinga 21 chu an thi tawh.

Armed Veng Branch YMA hi Chhinga Veng aṭanga indang­in August 3, 1969-ah din a ni a, member 1,760 an awm mek. Jubilee lawmna atan thisen pek te, veng chhung tihfai te, home ṭanpui te, hnam làma intihsiak te, infiamna lama inelnate leh thil dang hrang hrang an buatsaih a ni.