Pang Zirlai Pawl-in zirlai lawmna hun hmang

August 3, Inrinni khan Pang Zirlai Pawl (PZP) Sub-Headquarters, Lawngtlai chuan Lawngtlai CYLA Hall-ah member tharte lawm luhna leh hlawhtlinna changte lawmpuina, Freshers' Social cum Felicitation an buatsaih a, Assembly deputy speaker Lalrinawma 'n a hmanpui.

Lalrinawma chuan, Mizoramin zalenna a sual kawngah Páng hnamin an thawh hlâwk hle tih sawiin, "Kan chawr chhuahna leh pianphung ni loin, kan rilru puthmang a pawimawh a, mi theih ang chu ka thei ve tih rilru kan pu tlat tur a ni. Ram leh hnam, khaw­tlang leh chhungkua rûntu HIV/AIDS dona hmanraw ṭha ber chu mahni invawn thianghlim tlat a ni," a ti.

CYLA president J Sang­thangpuia pawhin thu a sawi a; mahni hnam zahpui lo a, hnam ziaráng vawn nun a pawimawh thu sawiin, zirlaite chu an nun uluk a, Pathian hre chunga taima taka lehkha zir turin a chah. PZP hian unit 12, sub-headquarters panga leh joint headquarters pakhat an nei a; Lawng­tlai Sub-Headquarters hnuaiah member 176 an awm mek a ni.