ZPM party president thar Lalliansawta

Zoram People’s Movement (ZPM) Val Upa Council chuan, hun khaihlak (interim) chhunga ZPM office bearer turte a ruat a, president atan Lalliansawta, ZPM Steering Committee chairman ni lai an dah.

ZPM office-bearer thar­te hi nimin khan ZPM pi­saa inkhawmah Val Upa Council (VUC) secretary Dr Thang­chungnunga'n a puang a ni.  Office bearers dangte chu vice president atan Dr Kenneth Chawng­liana, Lalthansanga (Chatea) leh Rev. Darchungnunga te an ni a, treasurer atan C Lalṭanpuia ruat a ni.

ZPM thuchhuah chuan, July 23, 2019-a ZPM Executive Committee meeting-in a rêl angin, ZPM chu Election Commission of India-ah political party anga ziah luh a nih tâk avangin, dan anga hruaitute thlan theih a nih hma, kum khat emaw atan interim office bearer ruatin ZPM VUC a lo ruat a ni. VUC chuan member thar atan Rev. Dr V Kapênga an ruat tel nghal.

Nimina inkhawm hi ZPM Ṭhalai chairman Malsawm­zuala'n a kaihruai a, president thar Lalliansawta chuan, ZPM president thar a ni thei chu a hun tawng ropui tak a nih thu a sawi a, Mizoram mipui chu kum 2023 MLA inthlanpuia ZPM sorkar kalphung thar a thlen ngei theih nana thawhpuiah a sáwm.

MLA C Lalsawivunga pawhin thu sawiin, kum 2023 inthlanpuiah mipuiin ZPM an thlir ber tawh dawn tih a sawi a, "Brig. T Sailo hi zui tlakah kan ngai a, a policy hi kan ramin a mamawh nia kan hriat avangin kan zui a, mahse, heti hi kan ni ta si a. Chumi kara ZPM a lo piang nawlh mai hi Pathian hnathawh a ni ang tih hi ka pawm dan a ni," a ti.

Inkhawmah hian ZPM vice president ruat thar pathumte leh treasurer-ten thu an sawi ṭheuh a ni.