Champhai leh Tahan inkara bus service turin A ṭul ang bawhzui zel a ni - TJ Lalnuntluanga

Transport minister TJ Lalnuntluanga chuan, Champhai leh Tahan, Myanmar inkarah khualzin phur bus tlàntir a nih theih nan sorkar laipuiin a ṭul angte an la bawhzui zel thu a sawi.

TJ Lalnuntluanga hian nimin khan Mizo Hnam Rûna inkhawmah thu sawiin, tun hnaia a zinna New Delhi-a Ministry External Affairs (MEA) minister Dr Subramamnya Jaishankar a kâwmnaah Champhai leh Tahan inkara bus service tir chungchang a sawipui tih a sawi a, "Zo fate inpumkhatna atan leh inkalpawhna atan Champhai leh Tahan inkara bus service tir kan duh thu leh External Affairs minister kal chhuak ta Sushma Swaraj-i'n min remtihsak tawh thu ka thlen a ni," a ti.

MEA minister Dr S Jaishankar ṭawiawmtu official-te'n bus tlantir turin hma an lak chhunzawm zel thu an hrilh tih sawiin Transport Minister chuan, "A kaihhnawihah tih tur a tam a, Myanmar lamte nen pawh inbiak ngaihna a la tam thu an sawi a ni," a ti a; Myanmar lam nena inbiakpawh ngai thil a nih avangin hmalakna duh anga a kal chak theih loh thu a sawi.

New Delhi-a Myanmar Ambassador pawh a kawm thu sawiin TJ Lalnuntluanga chuan, "Ka sàwmna ngai pawimawhin Mizoram House-ah a lo kal a, Champhai leh Tahan inkara bus service chungchang ka sawipui. Myanmar sorkarin an tih tur an tih theihna atana hma la turin ka hrilh a, India sorkar lamah theihtawp kan chhuah ve thung tur thu ka sawi a ni. Hma a lak nghal tur thu min hrilh," a ti.

TJ Lalnuntluanga chuan, Shipping minister Manshuk Mandaviya pawh a kawm thu sawiin, "Mizoramin economic life line pakhat Aizawl leh Silchar inkar chauh kan rin thu te, communal feeling vanga kawng dan avangte leh leimin vanga harsatna a awm fo avangin, inland water transport tihchangtlun kan mamawh thu ka thlen," a ti a; Union Minister chuan theihtawp chhuahpui a tiam niin a sawi.

Transport Minister sawi danin, Union Minister chuan thurâwn angin inland water transport tihhlawhtlin a nih theihna atan secretary level-ah team siam a ni ang a, DPR-te siamin, team an dinte chu a rang thei ang berin Delhi-ah tirh thlak an ni ang.

TJ Lalnuntluanga chuan, Chief Minister DO letter bawhzuiin, Mizoram University Eastern Campus, Champhaiah leh Southern Campus, Lungleiah din a nih theihna atan Union Human Resource Development minister Dr Ramesh Pokhrijal Nishank a sawipui thu a sawi a, "Union Minister hian an lo zir chian tur thu leh New Education Policy nen a inrem a nih chuan din ngei a nih theihna tura hma a lak tur thu min hrilh," a ti.

Inkhawmah hian TJ Lalnuntluanga hian C Zama lehkhabu ziah 'Zin kawng thu' tih a tlangzarh nghal a ni.