KHAWTHLIR

Mizoram Police chuan thuchhuah siamin, driving licence lem siamtute'n licence lem an siamsakte list, hming 1,200 chuang an neih vek tawh thu an tarlang a, "Vawiin thlenga driving licence lem la kawl leh la surrender ve lote chu mualpho taka man buai kher ngai loin, a rang thei ang bera Bawngkawn Police Station-ah inhriattir tur leh an licence-te thehlut thuai turin kan ngenin kan hriattir a ni," an ti.

Mamit bialtu MLA H Lalzirliana chuan nimin zing khan Dapchhuah leh Dampui inkara NH-44-A kawngpui min leh a helna tur kawng laih belh mek a hmunah a tlawh a, YMA Sub-Hqrs, Mamit hruaitute'n an ṭawiawm. H Lalzir­liana chuan, kawngpui kaltlang theih loh chu nimin chawhnu lamah tal siam tlang turin a siamtu company hotute a hrilh a ni.

Tuirial bialtu MLA Andrew H Thangliana chuan nimin khan a bial chhung, Thingdawl Hmarvenga August 4, Pathianni zinga in chim neitu J Sama te a tlawh a, chhiat tâwkte ṭanpuina tur sum leh silpauline-te YMA branch hnenah a hlan. J Sama te chhung­kua hi zinga an la mut laiin an inin a chim hnan a, vanneihthlak takin an hliam lo a ni.

Siaha asst. commissioner Amol Srivastava chuan nimin khan Siaha khawpui chhunga anganwadi thuam ṭhat mek pakuate a hmunah tlawhin a enfiah. Siaha district chhunga anganwadi-te chu tui, eirawngbawlna gas, electric power connection pek vek tum a ni a, chumi atan chuan hmalak mek a ni. Ruahtui lâkna/khâwlna tur a remchanna hmun apiangah siam tum a ni bawk.

Nimin khan Mamit High School-ah Student Police Cadet (SPC), Mamit district induction neih a ni a, district bawrhsap Dr Lalrozama leh SP Shashank Jaiswal ten an hmanpui. SPC-ah hian high school aṭangin zirlai 22 leh middle section aṭangin naupang 22, an vaiin mi 44 lak luh an ni a; SPC thil tumte an inzirtir nghal a ni. SPC-in a tum ber chu, zirlai naupangte khua leh tui ṭha ni tura chher chhuah leh sualna hrang hrang do kawnga mi ṭangkai an nih theih nana zirtir a ni.