Rua/mau atan budget-ah sum dah a ni lo - Congress Ṭhalai

Mizoram Pradesh Youth Congress Committee (MPYCC) chuan, kum 2019-20 Mizoram budget-ah rua/mau chi buaipuina tur sum dah a ni lo tih an tarlang a; rua/mau chungchangah hian chief minister Zoramthanga chu, mi dang hriat ve loh tura puanhnuai thil tih a neih leh neih loh an zawt.

MPYCC chuan, rua/mau chungchangah Horticulture department-ah RTI Act hmangin thil chi hrang hrang zawh a nih thu an tarlang a; zawhna chhannaa a lan danin, rua/mau chi buaipuina atan 2019-20 Mizoram budget-ah sum dah a ni lo tih sawiin, "Mau chi supply-tu tur thlan a la ni lo. Mau chi supply turin tender koh a la ni lo a, mau chi supply tur hian eng criteria mah hman a la ni lo a, mau chi eng ang nge supply tur pawh hriat a la ni lo," an ti.

Congress ṭhalaite chuan, CM Zoramthanga'n Assembly session hnuhnung berah rua/mau chi chu lo thleng mai tur ang leh a ṭiak 3,000 vel chu hardening ti turin a ṭiak phun a nih tawh thu a lo sawi tawh tih an sawi a; mau chi siamtu tur monu a dam ṭhat chuan kar loah sing khat an rawn thawn thlak mai tur thu leh thla tin nuai khat rawn thawn ngei an tum thu, Assembly session-ah Zodintluanga zawhna chhangin CM-in a sawi tih an tarlang bawk.

MPYCC chuan, CM Zoram­thanga thil sawi leh RTI Act hmanga zawhna chhannate chu an inmil lo hle tih sawiin, "CM Pu Zoramthanga hian mimal biakpawh tur leh thlun zawm tur hual sa a lo nei tawh reng em ni? Mi dang hriat ve loh tura puanhnuai thil a awm zawk em ni, tih hi kan zawhna a ni," an ti.