Joint NGO-in CAB vangin Republic Day boycott dawn

NGO Coordination Commi­ttee (Joint NGO) chuan, The Citizenship (Amendment) Bill, 2016 (CAB) an dodal nan leh Lok Sabha-a pass a nih an duh lohzia lantir nan January 26-a Republic Day hman tur chu Mi­zoram pumah 'boycott' an tum. 

Nimina Joint NGO hruai­tute ṭhukhawm chuan thuchhuah siamin, CAB kaltlangpui lo tura sorkar laipui an ngennain awmzia nei loa Lok Sabha-in an pass chu hriatthiam har an tih thu a tarlang a, "Bill hi tihtawp a nih ngei theih nan na zawka dodal ṭha kan ti a, Republic Day, January 26, 2019 hi Mizoram pumah boycott ni se kan ti," tiin a tarlang.

Joint NGO chuan, Republic Day boycott tura an ngenna chu Mizo ram leh hnam tana thláwp tur leh Republic Day hmannaah kal lo turin Mizoram mipui, zirlai, sorkar hnathawk leh item nei tur zawng zawngte an ngen a ni.

NGO Coordination Commi­ttee chuan, CAB dodalna atana MZP-in naktuk Nilainia Mizo­ram khawpui hrang hranga kawng­zawh an huaihawt tur chu an thlawp thu leh, Mizoram mipui a tam thei ang ber thawk chhuak se an duh thu an tarlang bawk.