CADC CEM thar RM Chakma

Nimin khan Chakma Autonoumous District Council (CADC) Rest House-ah Lawngtlai DC N Chakhai-a'n CADC chief executive member (CEM) atan MNF Legislature Party leader Rasik Mohan Chakma chu rinawmna thu tiamtirin a la lut.

RM Chakma chuan, a kaihhruai sorkarin a ngaih pawimawh ber tur chu mi tin huapzo sorkar ṭha din a nih thu a sawi a, "Zirna, ei bar zawnna, khawtlang nun leh kawng hrang hrangah hma sawnna hmel hmuh tur a awm zel ang. Party bil induhsakna leh phuba lakna lam ni loin, a ṭha zawnga inthlakthleng chu kan sorkar hna thawh dan tur a ni. Hmun hrang hranga Chakmate hamṭhat nan leh CADC chhunga hnam hrang hrangte inkara inremna leh inzah tawnna a awmm theih nan hma kan la ang," a ti.

CADC-ah hian MNF-in seat pasarih, INC-in seat pariat (MDC pakhat a thih hnuah pasarih) leh BJP-in seat panga an nei ṭhin a; tun hnaiah INC MDC palite'n MNF an zawm avangin MNF-in MDC 11 an nei a, sorkar an siam thei chiah a ni. CEM thar RM Chakma hi kum 1999-2003 leh kum 2003-2008chhungin CADC CEM a lo ni tawh bawk.