Roll aṭanga Bru paih a nih theih nan Lunglei YMA an feh chhuak dawn

YMA sub-headquarters, Lunglei chuan thuchhuah siamin, Tripura relief camp-a awm mek Bru, Lunglei district chhunga electoral roll-a thun thar mi 200 chuangte paih an nih theih nan vawiin leh naktuk (January 22-23) hian an feh chhuak dawn tih an puang.

Lunglei sub-hqrs. YMA thuchhuah chuan, January 19, Inrinnia an rêl angin, kum 2018-a hnam hnatlang an neih tawh chu an bawhzui dawn tih a sawi a, "Mizoram páwna awm Tuikuk, constituency pathum - Lunglei South, Thorang leh West Tuipui constituency chhunga 2018 Electoral Roll Revision hnuhnung bera mi 200 chuang thunte object hna thawk tur leh, mahni consti­tuency chhunga awm loa hun rei tak Tri­pura chhung Hazacherra, Nasingpara leh Khakchangpara-a chengte Form-7 hmanga object hna thawk turin January 22-23 hian kan feh chhuak dawn a ni," a ti.

Lunglei YMA tarlan danin, feh chhuak turte chu hlawm (team) parukah an inṭhen dawn a; team pahnihin Thorang bial an tuam ang a, team pathumin West Tuipui bial leh team pakhatin Lunglei South biala Zehtet leh Bûknuam-te an tuam dawn a ni.

Thorang constituency chhunga kal turte chu Sub-Hqrs. YMA vice president K Lalfakzuala leh treasurer K Lalhmingliana ten an ho ang a, Lungsen Group YMA leh Zawlpui Branch YMA-ten an lo thawhpui ang.

West Tuipui biala kalte chu Sub-Hqrs. YMA secretary Ngurthansanga Sailo leh assistant secretary Lalhmingmawia ten an ho ang a, Lungsen Group YMA leh Tlabung khaw chhunga YMA branch hrang hrangte'n an lo thawhpui ang.

Lunglei South biala kal turte chu Sub-Hqrs. YMA SEC member David T Lalfamkima'n a ho ang a, Chawngte Group YMA leh Vaisam Group YMA ten an lo thawhpui ang.

YMA Sub-Hqrs., Lunglei chuan, elec­toral roll aṭanga Bru-te paih an nih theih­na tura hmalaknaah hian Mizoram chhim lam mipuite chu thawhpuiah an sáwm a, "Mizoram chhunga chêng duh lo Tuikukte Mizoram elec­toral roll aṭanga paih an nih ngei theihna tura theihtawp chhuah turin Zoram mipui kan sawm thar leh che u a ni," an ti.