AMC hotute'n khawpui fai dan an zir

Aizawl Municipal Cor­poration (AMC)-a councillor pasarihte leh official pakhatte chuan, tunlai hian India ram khawpui hrang hrang an tlawh mek a, state dang khawpuia bawlhhlawh sawngbawl dan leh plastic hman lohna khawpui ni tura hma an lak dante an zir.

AMC hotute hian January 14 khan Aizawl chhuansanin Bengaluru an pan a, January 16 khan Bengaluru khawpui tlawhin, an mayor leh official-te nen an inkawm a; Bengaluru khawpuiin plastic hman lohna khawpui ni tura an hma an lak dan an zir chiang a ni.

Bengaluru municipal hotute chuan, hma an lak dan video clip hrang hrangte an entir a, AMC hotute zawhnate an sawifiah a; bawlhhlawh paihna/sawngbawlna hmunte tlawhpuiin, bawlhhlawh/plastic an sawngbawl dante an entir bawk.

January 17 khan AMC hotute chuan Mysuru (Mysore) khawpui tlawh lehin, Mayor leh official dangte nen an inkâwm a, khawpui faina lama an hmalak dante an zawt a ni. An inkawm zawhah plastic leh bawlhhlawh sawngbawlna hmun an tlawh leh bawk. AMC hotute chuan, Mysuru khawpui chu a fai thu leh an hnen aṭangin Aizawl khawpui faina hmalak dan tur eng emaw zat an hriat belh a, Aizawl tan hmasawnna tur tam tak a la awm thu an tarlang.

AMC hotute chuan January 18 khan Goa khawpui Panaji an tlawh leh a, Panaji Municipal Corporation hotute nen an inkawm a, khawpui faina kawnga hmalak dante an inhrilh a ni.

AMC hotute chuan, India rama khawpui fai tak takte an tlawha bawlhhlawh an sawngbawl dan an zir aṭangin, an hmalak dan ang chu Aizawlah pawh tih ve theiha an ngaih thu an sawi a, "Corporation leh mipui an ṭangrual em em a, keini Mizote phei chu anni aia hnam inhmangaih, ṭanrualna kawngah phei chuan anni aia thawk nasaa hma la thei tur kan ni," an ti.

India ram khawpui fangtu AMC councillor-te chu - Lal­hmingmawia, R Thanglura, R Lalbiakthanga, H Zonunsanga, H Vanlalruata, B Lalawmpuii leh Zonunsangi Fanai te an ni a; vawiin hian Aizawl an rawn pan dawn nia thu dawn a ni.