Retheite nena thil ṭha tihho hi ZPM thil tum a ni - K Thanzauva

Zoram Peoples' Movement (ZPM) chuan nimin khan an pisaah chhung inkhawm neiin, an leader K Sapdanga'n a kaihruai a; Rev. Dr K Thanzauva'n thu sawiin, "Retheite tana thil ṭha ṭhenkhat tihsak mai ni loin, retheite nena thil ṭha tihho hi ZPM thil tum a ni," a ti.

Rev.Dr K Thanzauva chuan, "Retheite rahbeha an awm leh, chu'ng rah­beha awm mekte hmanga thil sual ti ṭhinte hi kan dodal a ni," a ti a; Pathianin mi retheite tana thil eng emaw an tihsak mai chu a duhtâwk lo tih a sawi.

K Thanzauva chuan, Isua chu mihringte thih hnua vanram kal tur ringawtin a chhandam lo nia sawiin, "He leiah ngei hian chu chhandamna chu chang a, hnehchhiah tuar te, rahbeha awm mekte leh rethei riangvaite tana khawvel nuam siamsak tura chhandam kan ni. Chu chu Kristian ethic a ni a, ZPM thil tum pawh a ni," a ti.