Mizorama MLA an neih tlem chhanah BJP president-in Cong president a puh

BJP, Mizoram Pra­desh chuan an pisa chu kum 2019 atan nimin khan an hawng a; hawnna inkhawma thu sawitu Prof. JV Hluna, Mizoram BJP president chuan, nikuma Mizoram Assembly inthlanpuia BJP-in MLA an neih tlem chhan chu Congress President 'tactic chhe mi' vang niin a sawi.

Prof. JV Hluna chuan, Congress President 'tactic chhe mi' vangin BJP-in MLA an nei tlem nia sawiin, "Inthlan hmaa BJP boruak lian lutuk an hlauh avangin mipui thinlung inhawng, hmasawnna tak tak duh vanga BJP zawmtute thinlung lak pênna a ngaihtuah a, chu chu kan chhiat phah ta a ni," a ti. Mahni hmasial taka Congress President hmalakna chu Congress ngei pawhin an chhiatpui nia sawiin, "Kum 10 lai sorkar leh hnathawk ṭha inti tak sorkar chuan MLA pali an neih phah ve ta tho a ni," a ti.

The Citizenship (Amendment) Bill, 2016 chungchangah JV Hluna chuan, "NGO leh kohhran hrang hrangte duh dan chu Mizoram BJP-in kan do lo mai ni loin, Mizo kan nih angin kan thláwp em em a, Prime Minister hnenah pawh ziakin kan thlen tawh a, chu kan thu thlen ang tho chu tuna kan dinna a la ni reng," a ti a; CAB chu Mizoram tan a ṭhat loh thu a sawi.

Inkhawmah hian Mizoram BJP general secretary Vanlalhmuaka chuan, Lok Sabha in­thlan awm turah BJP-in Mizoramah candidate an neih ngei tur thu a puang a ni.