Hmasawnna hnathawh dan tur sawiho

Minister Robert Ro­mawia Royte chuan nimin khan a pisaah a bial Aizawl East-II chhunga local council member-te a kâwm a, an biala hmasawnna hna thawh dan tur a sawipui.

Robert Romawia Royte chuan, mipui ai­awha thlan tlin local coun­cil member-te chu an bial leh ram hmasawnna tura thawhpuiah a sáwm a, "Party inan lohnate dahṭha a, mipui tana lungrual taka thawhho a ngai. Ka awm lohna party aṭanga LC atana thlan tlinte chu in mi fin chhuahna ka mamawh zual a ni," a ti.

Zoramthanga kaih­hruai sorkarin langtlang sorkar kalpui a tum thu sawiin Robert Romawia chuan, "Thuneihna pawh sem zai tum a ni. Kan bial chhunga sorkar hnathawh reng rengte pawh LC-te hriatpuina veka thawh tum a ni," a ti a; sorkar hmasain an bial chhunga hna a thawhte chu a theih ang anga chhunzawm a nih tur thu a sawi bawk.

Meeting-ah hian LC member-te chuan an veng chhung hmasawnna atana an mamawh hrang hrangte an sawi a ni.