A dawng âwm takte'n sorkar aṭangin an chanvo an dawng tur a ni - Ruatkima

Rural Development minister Lalruatkima chuan, hleih nei taka hmasawnna hna kalpui ṭha a tih loh thu leh a mamawh tak takte'n sorkar aṭanga ṭanpuina awmte dawng ngei se a duh thu a sawi.

Lalruatkima hian nimin khan MNF Tlung­vel Group-in Tlungvel High School-ah sorkar thar lawmna inkhawm an buatsaihah thu sawiin, "A mamawh tak te, a dawng âwm takte'n sorkar aṭangin an chanvo an dawng tur a ni a. Sorkarin emaw, mimalin emaw, miretheite chanvo kan chhuhsak hian Pathian malsawmna kan bêng baw ṭhin a, fimkhur takin hmalam pana kan kal a ngai a ni," a ti.

Sorkar chu party bil ta anga ngaihna a awm ṭhin chu pawi a tih thu sawiin Lalruatkima chuan, "He kan rilru hi paih a hun a, tu pawhin sorkar siam se, kan ta vek a ni. Sorkar hi MNF chauh siam a ni lo, kohhrante nasa takin an ṭawngṭai a, NGO-te sorkar ṭha nei turin nasa takin ke an pên a. Inthlan dawnah party boruak a lian a, ri nak nak ṭhin mah se, sorkar a din tawh chuan inthlan hmaa boruakte dahṭhat a ṭul," a ti a; Mizoram sorkar tharin huapzo sorkar a din chho mek niin a sawi.

RD Minister chuan, MNF policy SEDP chuan a huam zau hle tih sawiin, "A thlawna sum dawn lam a kâwk lo tih kan hriat a pawimawh. SEDP hi mi taima leh thawk tak taktu mipuite chhawm chhuahna tur a ni. Pathianin duhthusama sik leh sa ṭha min pek malsawmna hi SEDP hmangin hai chhuah kan tum a ni," a ti.

Bialtu MLA Lal­rinawma, Assembly deputy speaker pawhin thu sawiin, tuna Mizoram sorkar ding mek chu kohhran hote ṭawngṭai chhuah a ni tih pawm a ṭul thu a sawi a, "He sorkar tharah hian phuba lak emaw, thil dik lo tih a rem lo a, thil ṭha ti turin mipui zawng zawngte'n mawhphurhna kan nei vek a ni. Thuneihna kan rûi a nih chuan mipuite hian kan tlâk hun an nghakhlel mai dawn a ni," a ti.