SEDP-a tel lo danglamna hmuh tur a awm zeuh zeuh dawn - Dr Thangtea

Nimina Mizo Hnam Runa inkhawmah Health minister Dr R Lal­thangliana chuan, MNF sorkar tharah SEDP-a tel lo danglamna hmuh tur a awm zeuh zeuh dawn niin a sawi a; MNF vice president R Tlang­hmingthanga chuan, Chakma Auto­nomous District Council (CADC)-ah MNF sorkar a piang tawh tih a sawi bawk.

Minister Dr R Lal­thangliana chuan, MNF party kaihhruai sorkar thla khat vel chauh a la kal chungin hna tam tak an thawk hman niin a sawi a, "Sorkar tûk tûk lehah Cabinet meeting neiin sorkar zu zawrh kan titawp nghal. Hman ni lawka Cabinet meeting-ah blood processing fee lak kan titawp nghal a, Health Minister ka nihna anga ka ngenna angin Hnam Rûnah kan ṭhalaiten thisen an pe kha ka lawm hle a ni," a ti.

MNF sorkar hmasak laiin hna tam tak an thawk nia sawiin R Lal­thangliana chuan, "Kan zawh hman loh kha Congress sorkar kum 10 chhungin an chhunzawm lo a, PMGSY hnuaiah thingtlang khaw in 250 awmna chin chu motor kawng kan lai chhuak hman vek a, kan la zawh hman lohte kha kan chhunzawm zel ang," a ti a; hmun tam takah kawng thar laih hna leh blacktopping hna an thawh nghal thu a sawi.

Dr R Lalthangliana chuan, SEDP chu NLUP nena khaikhin chi a ni lo tih sawiin, "Sorkar department zawng zawng deuh thaw a huam a, NLUP anga hlawhtlinpui loh a awm ve thei lo ang. Ṭhalai lehkhathiam thawh tur nei lo tam tak tan pawh ruahmanna kan siam," a ti. Aizawla mirethei tam takte tan eizawnna tlak hna thawhtir an tum thu sawiin, "MNF sorkar tharah hian SEDP-a ziah lan loh danglamna a khát tâwkin in hmu zeuh zeuh dawn. Chini pawh ration-a sem leh a ni ang," a ti.

MNF sorkarin budget a ruahmanna tak tak tur chu April thla hnuah hman theih a ni dawn chauh tih sawiin R Lalthangliana chuan, "Tunah hian contract leh sorkar hna dilna tam tak a lo lut ruih ruih a, thla hnih/thum hnuah lo chuan thil tak tak a la tih theih loh ang," a ti a; sorkar hna tenauah pawh Planning, Finance leh DPAR kaltlang vek a ngai tih a sawi.