KHAWTHLIR

Comptroller Auditor General of India (CAG) chuan tun hnai khan notitification tichhuakin, Lalramthanga Tochhawng (IAAS) chu Mizoram Principal Accountant General atan ruat a nih thu a tarlang. Lalramthanga Tochhawng hian Director General of Commercial Audit and Ex-officio, Audit Board, Hyderabad nihna a chelh mek a ni.

Dampa bialtu MLA Lalrintluanga Sailo chuan a bial chhung khaw hrang hrang a tlawh a, a bial mipuite chu politics hmanga inbeihna, inchirhthehna leh phuba laknate bànsan a, ram hmasawnna tura thawhpuiah a sáwm.

MZP hruaitute chuan an president L Ramdinliana Renthlei hoin nimin khan LAD minister K Lalrinliana a pisaah an kawm a, Mizoram chhunga dan loa khaw din leh Mizoram leh Assam inrina ramri chungchang an sawipui. MZP hruaitute chuan, Mizoramah dan loa khaw din khaw 21 (Lunglei district-ah khaw 19 leh Mamit district-ah khaw pahnih) a awm thu sawiin, "Heng khuate hi Chakma leh Tuikukte'n an din a ni," an ti. Minister chuan, a rang thei ang bera ṭhiah a nih theih nan hmalak a nih tur thuin a lo chhangin niin an tarlang.

Mizo zinga sumdawnna lama hlawhtling leh langsar Rothangpuia (86), Tuikual South chu nimin khan vui a ni. Rothangpuia hi minister hlui leh MLA ni mek Zodintluanga leh MLA hlui Chalrosanga Ralte te pa a ni a; January 19, Inrinni zan dar 10:05 khan pneumonia leh chuap lam ṭha lo vangin Kolkata-a Apollo Hospital-ah a thi. A ruang chu January 20 khan an in thlenpui niin, zanah lumen a ni a, nimin khan Rev.Dr CL Hminga'n a vui a ni.

Mizoram Upa Pawl (MUP) hruaitute chuan, nimin khan an president RK Thanga hoin Raj Bhavan-ah Governor Kummanam Rajasekharan an kâwm a, upa zawkte hamṭhatna chungchang leh Mizoram mamawh ṭhenkhat an sawipui.