Covid-19 vaccine lâk vanga Harsatna lian tâwk an awm lo
State Steering Committee on COVID-19 Vaccination chu February 5, 2021 tlai khan chief secretary Lalnunmawia Chuaungo hoin Secretariat conference hall-ah an ṭhukhawm a, Covid-19 vaccine pek zel dan tur an sawiho. Vaccine pek vanga harsatna tâwk mi 307 awm mah se, harsatna lian tham tâwk an la awm lo.
Ṭhutkhawmah hian National Health Mission (NHM) mission director Dr Eric Zomawia chuan, Covid-19 vaccine pek tawh dan a sawi a; state immunisation officer Dr Lalzawmi'n healthcare worker leh frontline worker-te hnena vaccine an pek dan leh second dose an pek dan tur a sawifiah.
Dr Lalzawmi chuan, vaccine peknaah internet connection ṭha lo, CoWIN portal chiang lo, vaccine lâk hlau leh vaccine lâk nghakhlelte chu an harsatna tawh tam ber a nih thu a sawi. Covid-19 vaccine hi first phase-ah dose 18,500 dawn a ni a, second phase-ah dose 16,500 leh third phase-ah dose 30,400 dawn leh tura ruahman a ni.
Meeting-a tarlan danin, Mizorama district hrang hrangah vaccination session vawi 189 neih a ni tawh a, chawhrualin ni khata session 15 zel nei ang a ni. Vaccine hi healthcare worker dawng tura chhin chhiah mi 16,380 an awm a, chu'ng zinga mi 734 chu vaccine lakna hmun kal mah se, eng emaw avangin an la thei lo a, vaccine la tura kal lo hrim hrim mi 5,375 an awm bawk.
Vaccine pek tawh china healthcare worker vaccine pek ṭhatna ber chu Champhai district niin, 73% hnenah pek an ni tawh a, Kolasib district-ah healthcare worker 33% chiah pek tawh niin, pe tlem ber district an ni.
Committee on COVID-19 Vaccination hotute ṭhutkhawm hnuah Inrinni khan vaccine pek chhunzawm leh a ni. February 6, Inrinni bikah hian Aizawl East district-ah mi 133 leh Kolasib district-ah mi 93, an vaiin mi 226 pek an ni a; Inrinni tlai thlenga Mizoram puma vaccine pek tawh chu mi 10,781 an tling tawh.
Vaccine hi healthcare worker-te pek zawh hnuah frontline worker-te pek ve leh an ni dawn a; Mizorama frontline worker, Covid vaccine dawng tura inziak lut mi 27,557 an awm mek a, chu'ng mite pe tur chuan session 276 leh vaccination team 70 mamawh tura chhût a ni.
Covid-19 vaccine lak vanga harsatna tâwk (adverse event following immunization case) Mizoramah mi 307 a awm a, chu'ngte chu khawsik, taksa ná, lu ná leh vaccine-a an chiuna laia na neite an ni tlangpui.
Vanglaini palai zawhna chhangin Dr Lalzawmi chuan, vaccine vanga harsatna tâwk zingah harsatna lian tham tâwk an awm lo tih a sawi a, "Vaccine kher lo pawh inchiu avanga harsatna tâwkte an awm ṭhin. Harsatna tâwk kan tihte hi harsatna lian tham a ni lo a, damdawi-ina dah ngai an awm lo," a ti.
Frontline worker pek indawt dan tur
1 State leh Central police department mite
2 Armed force hrang hranga mite
3 Home Guard
4 Civil Defence Organization
5 Disaster Management volunteer
6 Municipal worker
7 Prison staff
8 Fire & Emergency department
9 PRI