KHAWTHLIR

Darlawn Venghlun village council-a reserved (hmeichhe) seat bikah February 5, 2021 khan vote thlak ṭhat a ni a, vote thlak zawhah chhiar nghal niin, ZPM candidate Lalhmingmawii thlan tlin a ni. Inthlan ṭhat a nih chhan chu, Mizorama VC thlan a nih ṭuma thlan tlin MNF candidate chu ballot paper leh thlan tlin a ni tih hriattirna certifcate-a a  hming ziah a inan loh vang a ni. Darlawn Venghlun VC reserved seat thlan ṭhatah hian vote 867 (65.4%) a tla a, vote tla zawng zawng aṭang hian thlan tlin tâk ZPM candidate  Lalhmingmawii'n vote 455 a hmu a ni.

Inrinni khan KṬP, Model Veng Branch-in an kohhran hall-ah Synod Hospital tan thisen unit 44 an pe a, a petute mipa 37 leh hmeichhia pasarih an ni a; KṬP, Tui-

khuahtlang Branch-in

KṬP Day pualin an kohhran hall-ah Civil Hospital, Aizawl tan thisen unit 42 pein, a petute mipa 36 leh hmeichhia paruk an ni. ECM KTP, College Vaih Bialin District Hospital tan unit 68 pein, petute mipa 38 leh hmeichhia 30 an ni a; SAY, Western Division, Kolasib member mipa 13 leh hmeichhia pangate'n District Hospital tan unit 18 an pe bawk.

Champhai District Magistrate chuan, huan lo ramte hâl a hun leh dawn hnaih avangin kângmei laka mi tin an him theih nan khapna thupek a chhuah. District Magistrate hian meilam ṭha tâwk tak sial loin huan/lo/leipui hâl loh tur a nih thu te, huan/lo/leipui hâl turte'n March 15, 2021 ral hmaa hâl vek tur a nih thu te, mihring nunna leh bungrua tana hlauhawm thei turin kângmei tihchhuah loh tur a nih thute leh ramhnuaiah mei chhèm timit loa kalsan tur a nih loh thute a tarlang.

Nimin tlai dar 5 dinhmun angin, State Referral Hospital-ah Covid-19 vei vanga enkawl mi paruk an awm mek a, ICU-ah mi pahnih leh Isolation ward-ah mi pali an awm. SRH-ZMC Bulletin tarlan danin, ICU-a awmte chu ventilator hmanga enkawl mek an ni a, ward-a awm zingah harsatna lian nei an awm lo. Mi paruk zingah hian kum 60 chung lam pakhat a tel a ni.