COVID-19: Mizoram dinhmun Hri vei chhuak tawh zat 99.27%
February 5, Zirtawpni leh February 6, Inrinni khan Mizoramah Covid-19 vei mi pakhat ve ve hmuh chhuah a ni a; Inrinni khan hripui laka fihlim tawh mi panga chhuahtir an nih laiin, niminah chhuahtir an awm lo. Hripui vei hmuh tawh mi 4,382 zinga mi 4,350 (99.27%) an chhuak tawh.
Covid-19 vei February 5-a hmuh awm chhun chu ZMC laboratory-a hmuh chhuah a ni a, BSF sipai hnam dang a ni a; February 6-a hmuh thar chu Aizawla hmeichhia kum 21 mi, Rapid Antigen Test (RAT) hmanga hmuh chhuah, tualchhunga hri kái a ni.
February 6, Inrinni khan Covid-19 laka fihlîm tawh mi panga - Durtlang BSUP CCC aṭangin mi pahnih, SRH-ZMC, Lunglei Saizaikawn CCC leh Lawngtlai CCC aṭangin pakhat ṭheuh an chhuak a ni.
Mizoramah Covid-19 vei mi 4,382 hmuh chhuah a ni tawh a, mipa 3,205 leh hmeichhia 1,177 an ni. Nimin tlai dar 5 thleng khan mi 4,350 (99.27%) chhuahtir an ni tawh a, mi pakua (0.21%) thi tawhin, enkawl mek mi 23 (0.52%) an awm.
February 5, Zirtawpni khan ZMC laboratory-ah RT-PCR hmangin sample 86, TrueNAT-PCR hmangin district pariatah sample 35 leh RAT hmangin district 11-ah sample 1,456 endik a ni a; sample endik zawng zawng chu 1,577 niin, chu'ng aṭanga Covid-19 positive hmuh chhuah pakhat chu 0.06% a ni.
Zirtawpnia hripui vei hmuh chhuah chu mipa kum 45, BSF sipai, tun hnaia rawn lut, quarantine facility-a awm mek leh symptom nei lo a ni. TrueNAT-PCR leh (RAT) hmanga swab sample endikte a negative vek thung.
February 6 khan ZMC laboratory-ah sample 79, TrueNAT-PCR hmangin district pathumah sample 23 leh RAT hmangin district pasarihah sample 366 endik a ni a; sample endik zawng zawng chu 468 niin, chu'ng aṭanga Covid-19 positive hmuh chhuah pakhat chu 0.21% a ni.
Inrinnia hripui vei hmuh thar chu RAT hmangin Aizawla hmuh chhuah a ni a, College Venga hmeichhia kum 21, college luh dawn vanga sample endiktir a ni. Hri a kàina hriat a ni lo a, symptom nei lo a ni. ZMC laboratory leh TrueNAT-PCR hmanga sample endik zingah positive an awm lo.
February 6, 2021 thlenga Mizorama swab sample endik tawh zat chu 2,14,777 a ni a, chu'ng aṭanga Covid-19 positive mi 4,382 chu 2.04% a ni. Hripui vei hmuh tawh zinga mi 2,074 chu Mizoram chhunga kái an ni a, mi 2,308 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district paruk - Siaha, Champhai, Serchhip, Mamit, Saitual leh Khawzawl district-ahte Covid-19 vei an awm tawh rih lo a; Kolasib leh Hnahthial district-ahte pawh pakhat ve ve chiah an awm tawh a ni.