Kum 4 chhungin Mizoram sorkarin AMC-ah cheng nuai 139.86 a cháwi

Sorkar laipuiin Aizawl Municipal Corporation (AMC) hnena sum tur Mizoram sorkara a rawn pek, hunbi tiam chhunga sorkarin AMC hnena a pek loh avangin Mizoram sorkarin kum li chhungin Rs. 1,39,86,671 (nuai 139.86) a cháwi tawh.

Vanglaini palaiin a kawmnaah AMC hotute chuan, Finance Commi­ssion kaihhruainain a sawi ang chuan, sorkar laipuiin AMC sum tur Mizoram state sorkar hnena a rawn pêk chu pek ní aṭanga ni 10 chhungin AMC-ah an pe tur a ni, tih a nih thu an sawi.

AMC hotute sawi danin, sorkar laipui aṭanga AMC sum tur rawn kal, Mizoram sorkarin hunbi tiam chhunga AMC hnena a pek loh avangin Mizoram sorkar chuan pawisa a chawi (penalty) ṭhin a ni. Hunbi tiam rei zawng hi 14th Finance Commission hun lai chuan ni 15 a ni a, 15th Finance Commission hunah erawh chuan ni 10 a ni thung.

AMC hotute chuan, sorkar laipui aṭanga sum sanction order a awm hnuah UDPA department kaltlanga pek tur a ni a, state sorkarin sum a pek chhuah tlai avangin kum tin deuh thaw pawisa a chawi rualin, kum 2018-19 ah erawh chuan sum chawi a awm lo.