Thla 10 hnuah inkhawm ṭan a ni

Covid-19 léng vanga Mizoram­ah thla 10 leh a chanve chuang biak-ina inkhawm theih a nih loh hnuah sorkarin a phal angin Inrinni leh nimin khan inkhawm ṭan a ni ta. Mizorama kohhrante chu an inkhawm ṭan nghal a, kohhran tam ber chu an inkhawm chhâwk a ni.

Mizoram sorkar chuan biak-ina inkhawm hi February thla tìr aṭangin a phal ṭan a, chhûn lamah chauh inkhawm phal rih niin, biak-in ṭhutthlenga ṭhu thei zat (seating capacity) zatve (50%) vawi khatah inkhawm theih a ni.

February thlaa chhûn lama kohhran inkhawm awm theihna hmasa ber, Inrinni khan Seventh Day Adventist (SDA) kohhrante chu an inkhawm ṭan a; nimin Pathianni khan Mizorama kohhran tam ber dangte an inkhawm ṭan ve bawk.

Biak-in ṭhutthlenga ṭhu leng zat aṭanga a zatve (50%) aia tam inkhawm phal a nih loh avangin tualchhung kohhran tam ber chu an inkhawm chhâwk a; kohhran eng emaw zatin sunday school an neih ṭan nghal laiin, la nei ve rih lo an awm nual bawk a ni.

Pathianni bikah chuan, March 15, 2020 kha biak-ina inkhawm hnuhnung ber a ni a, Pathianni vawi 46 inkhawm theih loh a nih hnuah, nimin khan inkhawm ṭan theih a ni leh ta a ni.