Party dang a zuih zawngin an kal - Zoramthanga

Chief minister leh MNF president Zoram­thanga chuan, MNF chu Mizorama political party upa ber a ni a, hmasawn zawnga an kal mek laiin, party dangte erawh chu a zuih zawngin an kal mek niin a sawi.

Zoramthanga hian February 6, Inrinni khan Nursery Veng VC Hall-ah AMC inthlan atana campaign a hawnnaah thu sawiin, Congress party tlûk chhiat dan leh ZPM party-in hruaitu chi hrang hrang an neih dante a sawi a, "Kohhran kan unit an ti a, mipuiin an awih a nih kha. Kan han inthlang a, MNF kan chak ta em em a ni," a ti. 

Political party dangte chu a zuih záwngin chak takin an kal mek nia sawiin Zoramthanga chuan, "Congress phei chu zu an zuar a, kan thi zawih zawih. An thil tihin a vaw lêt a, tunah phei chuan mipuiin thochhuak leh turin an beisei tawh lo. Kan inthlan result-te thlirin, party dangte hi ka sawi zuih ni loin, an zuih tak zet zawk a ni," a ti a; MNF erawh chu hnam thuthlung vuantu leh India rama party upa ber pawl a nih thu a sawi.

MNF President chuan, party ṭhenkhat chu tui anga nghet lo an nia sawiin, "Party an thlâk zut a, an hming pawh kan chhinchhiah séng lo. MNF chu Pathianin min remkhawm chho zel a, varparh arsi a êng zual zel a, AMC-ah pawh kan chak ang. Congress hian AMC-ah seat pahnih an la phak ang em, artelukàwn thei an ni. ZPM-te hi DP, MNU, MNF, ZNP, ZPM ni zut thei leh tui anga nghet lo an ni a, mipuiin an ring tak tak thei lo," a ti.

Inkhawmah hian AMC Ward-XV atana MNF candidate Lalrindika Royte pawhin thu a sawi a ni.