ZPM-ah eirûkna leh hlemhlêtnate'n Hmun an chang dawn lo - Duhoma

ZPM party leader Lalduhoma chuan, ZPM-in sorkarna an chan hunah chuan dik tak leh langtlang takin ram an hruai dawn a, eirûkna leh hlemhlêtnate'n hmun an chang dawn lo tih a sawi.

Lalduhoma hian February 6, Inrinni khan Sairangah ZPM zawm thar a lawm luhnaah thu sawiin, party-te'n kalphung an nei hrang hlawm tih a sawi a; ZPM zawm tharte chu MNF leh Congress kalphungte ZPM-a seng lut lo tura ngenin, "ZPM hi kalphung hrang nei kan ni a, Pathian leh kohhran mitmei vénga kal tur kan ni. Dik tak leh langtlang takin ram kan hruai ang a, eirûkna leh hlemhlêtnate'n hmun a chang tur a ni lo," a ti. 

Awmna páwl a dik tawh lo a nih chuan insawn ngam tur a ni tih sawiin Lalduhoma chuan, "Mi ṭhenkhat, an awmna páwl sawn si lo, an auhla (policy) sawn an awm a, auhla (policy) sawn hi a pawi. ZPM pawh hun kal zelah hruaitute inthlakin, party hming thleng hian la danglam ve thei a ni a, hetiang hun a thleng a nih pawhin kan au dan hi a ngai reng tur a ni," a ti a, policy chu sawhsawn tur a nih loh thu a sawi.

ZPM Leader chuan, AMC inthlan turah an khingpui party-te'n ZPM an huphurh hlea a lan thu sawiin, "ZPM sawichhiatna tel loin thuchhuah vawi khat pawh an nei thei lo a, hei hian AMC-a ZPM dinhmun tur chu a tichiang mai àwm e," a ti. Amah pawh mimal taka beih a nih thu sawiin, "Kan khingpuite'n na tak takin min sawichhe mah se, tlàwmna nun nen a dawhtu zawkah i ṭang zel ang u," a ti.

ZPM thuchhuah chuan, Sairangah hian Lalduhoma'n ZPM zawm thar mi 205 a lawm lut niin a tarlang.