Thuneihna hmangsualah CM leh a minister-te puh

Congress party chuan Inrinni khan AMC inthlan atan Mission Vengthlang kâwnah campaign hawn­na an buatsaih a; MPCC treasurer Zodintluanga Ralte, MLA chuan thu­neihna hmang sualah Chief Minister leh minis­ter-te a puh.

Zodintluanga Ralte chuan, State Election Commission-in inthlan a puan hnuah veng hrang hrangah thuneihna hmang sualin, vote zawn­na atan Chief Minister leh minister-te'n infiamna hmun tur ram an zawng der niin a sawi a, "Hei hi Elec­tion Commission Model Code of Conduct Rules bawh­chhiatna a ni," a ti.

MPCC Treasurer chuan, MNF sorkar chu mipui harsatna siam belh zelah puhin, "Covid-19 avanga ram pum kan buai a, mipui dinhmun ṭha lo taka a din laiin, tunah petrol leh diesel-ah chhiah thar hmangin mipui phurrit an siamsak leh a ni," a ti a; Aizawl khawpui leh Mizoram mipui harsatna sukiang turin Congress party-in hma an lâk tur thu a sawi.

MNF sorkarin AMC chungchanga tha thawhtu leh ṭhahnemngai tak anga an insawi chu thil zahthlak tak nia sawiin Zodintluanga chuan, "AMC tana pawimawh Mizoram State Finance Commission pawh an din duh lo. Hei hian sum leh paiah AMC leh state-in harsatna an tawh phah a ni," a ti.

Inkhawmah ward XIV-a Congress candidate Lalṭhakimi te pawhin thu an sawi a ni.