Sorkar advertisement kal danah Kolasib MJA-in hmalak an rêl

MJA, Kolasib district chuan February 5, Zirtawpni khan Serlui-B Hydel Project tuikhuaha Hawla Island-ah Annual Conference leh inhlan tharna an hmang. Sorkar aṭanga advertisement an dawn ṭhinah classified advertisement ngei tura ngaih display advertisement-a chhuahtir a awm fo chu a ṭul anga bawhzui 

an rél.

Kolasib MJA president R Lalhmingthanga chuan, Kolasib district-a media mite'n ram leh khawtlang hmasawnna atan te, thil dik lo titute'n an tih zel lohna tura an tih dik loh hâi chhuah kawngahte hma an lak ṭhin chu chhunzawm zel turin MJA member-te a chah.

R Lalhmingthanga chuan, media-te'n mipui hriatah thil fel lo leh dik lo tam tak an tihchhuah tawh thu sawiin, "A ṭhen chu pawlin hma kan laknate a nih rualin, a ṭhen chu mimal hmalaknate a ni," a ti a; hmasawnna kawngah an intihhmasawn ve zel a ṭul thu a sawi.

Kolasib MJA President chuan, an district chu zangnadawmnaah an mualpho fo tawh tih sawiin, "Tun hnaiah pawh NH-306 four lane-a laihna tur nia ngaihah mi ṭhenkhatin pass an lo dil tihte kan pho chhuak a, thil dik lo leh fel lo tam tak kan hâi chhuah a, thil a kal dik theihna tura hma kan la hi a lawmawm tak zet a ni," a ti a, an hmalakna chhunzawm zel turin member-te a fuih.

Thil dik lo an hai chhuah rualin fimkhur a ngaih tih sawiin R Lalhmingthanga chuan, "Kan hmalakna ṭha tak tak avangin mipui vantlang hmuhah mawi taka kan lan theih rual hian, kan fimkhur tâwk loh chuan keimahni bawk hi páwl timualpho thei kan ni," a ti.

Kolasib MJA President tarlan danin, Serlui-B tuikhuah chu a tirah kum 50 daih tura sawi a nih laiin, tunah kháwl pathum zinga pakhat bâk tihnun hleih theih loh khawpin tui a tlem a, chu chu tuikhuah enkawltu an awm mumal loh vang leh EFCC department-in chainshaw permit an pekte'n lui kama thingte an zai nasat vang a ni.