AMC atan party hrang hrang an campaign

February 16, 2021-a Aizawl Municipal Corporation (AMC) inthlanah chak ngei tumin political party hrang hrangte an campaign mek zel a, February 6, Inrinni pawh khan party hruaitute chuan hmun hrang hrangah vantlang inkhawm neiin thu an sawi.

Congress party hruaitute chuan Inrinni khan Mission Vengthlang kâwna campaign hawnna an hmanpui a; minister hlui Lalsawta chuan, ram hruaitute'n thu an sawi mai mai tur a ni lo tih a sawi.

Lalsawta chuan, ram hruaitute chu mipui rawngbawltu an nih avangin thu rintlak an sawi tur a ni tih sawiin, "Thu kan sawi tawh chuan mipuiin a hlawhtlinna an hmu tur a ni. AMC pawh state sorkarin a duh duh dana a hrêk emaw, a lo suasam ve vak vak emaw tur a ni lo. AMC chu chaw barh ngai leh kaih ngai a ni lo," a ti. 

MPCC general secretary PC Lalthanliana pawhin thu sawiin, "Politics-ah kan tui lo a ni thei, ram leh hnam siam hi kan tihtur leh uluk taka ngaihven erawh a ngai," a ti a; Mizoram hmasawnna hna thawka beiseina sang tak mipuiin an neih laiin Chief Minister chuan ram leh hnam hmasawnna hna thawhna tura ruahmannate chu a phuahchawp leh risk mai mai a sawi ṭhin thu a tarlang.

PC Lalthanliana chuan, ZPM party chu a hming a thar a, a mihringte erawh an hlui tih sawiin, "Kalphung thar tiamtu chu dan bawhchhiat vangin bàn a ni a, an MLA dang an ngawi hmiah. MLA hlawh tihhniam leh MLA car leina senso a tam titute ngei khan MLA hlawhpung nen lam an lak bakah, MLA car leina pawh a pung nen lam an hûi fai vek a ni," a ti.

MNF adviser Dr R Lalthangliana chuan Inrinni khan MNYF-in Bethlehem Vengthlang kâwna street campaign an buatsaihah leh Vaivakawna MNF campaign office hawnaah thu a sawi a; February 5 zan khan College Veng leh Republic Vengah thu a sawi bawk.

Dr R Lalthangliana chuan, AMC hi MNF din leh fa hrin a ni tih sawiin, party dangte'n AMC-ah direct funding a awm thu an sawi ṭhin chu a theih tak tak loh niin a sawi a, "State sorkar kaltlanga tih a ngai zel a ni," a ti.

Kum 10 kal ta chu state-ah Congress sorkar lai a nih avangin kum 2015-2020 khan AMC-ah MNF sorkar mah se, thil a tih theih tak tak loh nia sawiin, "State sorkar kaltlanga tih a ngai zel a. Tunah chuan state-ah MNF kan sorkar tawh a, AMC-ah pawh ruling MNF candidate-te ngei kan tihtlin a ngai a ni," a ti a; MNF an sorkar chuan ward tinah hmasawnna a lut dawn niin a sawi.

MNF adviser Lalruatkima pawhin Inrinni khan Dinthar community hall-a AMC Ward-XII campaign hawnna leh ward manifesto a tlangzarh a; party hrang hrangin AMC-ah sorkarna an chelh tawh tih sawiin, "AMC musical chair ti hiala rorelna mumal awm thei loa siamtute kha Congress leh tuna ZPM inti tate hi an ni. AMC hnathawk tak tak thei nei tur chuan state-a sorkar lai kan sorkar ngei a ngai," a ti.

Lalruatkima chuan, Congress chu solfa vaitu awm lo zaipawl ang an nih thu sawiin, "Vice president an nei thei lo. An sorkar lai ngeiin party dang thawhpui chung pawhin AMC-ah hian an sorkar zo tawh lo," a ti a; ZPM pawh ṭha berah inchhál mah se, an ṭhat berna hmuh tur a awm loh thu a sawi bawk.

MNF adviser dang Dr K Beichhua pawhin Zonuamah hun hmangin thu a sawi a, AMC inthlan turah ruling party candidate-te thlan tlin a pawimawh nia sawiin, "Ṭingṭang hrui herh mil chuan hla zawng zawng a rem thei ang hian, a key herh dik thiamte bialah development a lut duh bik," a ti.

Dr K Beichhua chuan, "AMC-a rorelna keng tur hian Congress, ZPM leh BJP mi ṭha tak tak Pathianin a ruat hrih lo. Zoram enkawl turin MNF hruaitute hriak a thih tlat a ni," tiin, chu chu MLA inthlan hnua inthlan dangahte a lan chian thu a sawi a ni.

ZPM Ṭhalai chuan Inrinni khan Aizawl khawpui hmun hrang hrangah street campaign an buatsaih leh a; an party hruaitute leh AMC-a an candidate-te'n thu an sawi a ni.

ZPM ṭhalaite hian veng hrang hranga hmun 43-ah street campaign an buatsaih tawh a, Inrinni pawh khan AMC ward pali huam chhunga hmun 12-ah an buatsaih a, an star campaigner-te bakah, ward-VII-a an candidate H Lalfakmawia, ward VI-a an candidate Zohmingthanga Zote, ward X-a candidate Lalremliani leh ward XIII-a candidate Zothanmawia ten thu an sawi.

ZPM star campaigner-te chuan, ZPM candidate-te chu thlan tlin an nih hnuah pawh an hnathawh a dik leh dik loh te, an tiam anga an awm leh awm lohte lo enpui a, lo vilpui turin mipui an sáwm a ni.

MLA Vanlalhlana chuan February 5, 2021 khan AMC Ward-I chhunga Selesihah a campaign a; ZPM-in symbol an la thlak loh thu sawiin, "Symbol thlâk awmchhun chu MNF party chiah an ni. ZPM hian symbol a la nei ngai lo. MNF hruaitu ṭhenkhatin ZPM chu symbol thlâk ṭhin, symbol mumal nei lo nia an sawi ṭhin hi thil an hriat chian loh vang a ni," a ti. 

Vanlalhlana chuan, MNF chu dâwt an sawi dawn apianga Assam Rifles sawi ṭhinah puhin, "An sorkar tirhin Chapchar Kûtah Lammual chu Chapchar Kût hman leh hunah chuan kan ta a ni tawh ang, an ti a. Kum 2019-ah Pu Lalrintluanga Sailo-in Assembly House-ah private resolution pu lutin, 'Pu Zoramthanga CM laia Assam Rifles an chhuak hi lawmawm kan ti,' tiin AR chhuah hma hauhin resolution min pass-pui lui a ni," a ti a; tun hnaiah MNF President-in a sawi leh tawh bawk thu a sawi.