Anti-Defection Law-in min phuar lo - ZPM Legislature Party
ZPM Legislature Party (ZLP) member-te chuan nimin khan Aizawl Press Club-ah thuthar thehdarhtute an kâwm a; ZPM MLA-te chu Anti-Defection Law-in a phuar loh thu an sawi rualin, ZPM-ah nihna pawimawh chelh kher an tum loh thu an sawi. Jammu & Kashmir laka BJP sorkar thil tih dan chu Mizoram leh hmarchhak state-te chunga thleng ve thei nia an hriat thu an sawi bawk.
ZLP leader Lalduhoma chuan, Parliament-ah kum 1985-a Anti Defection Act siam a nih laiin Mizoram MP a nih lai a nih avangin a siamtute zingah a tel ve tih sawiin, "Dan siamtute zinga tel ve ka nih rualin, he dan hmanga action lak khum hmasak ber ka ni," a ti. Independent MP leh MLA-te'n political party an zawm a thiang lo tih sawiin, "An zawm chuan disqualify theih an ni a, a chhan chu political party mite chu anmahni thlangtute an ni lo. He dan hi min thlangtute phatsan tihtawpna tura siam a ni," a ti.
Mizoram Assembly speaker Lalrinliana Sailo-in tun hnaia independent MLA-te chungchang a sawi chungchangah Lalduhoma chuan, "Keimahni min vaunate pawh a ang lek lek. Anti Defection Law-in independent MP/MLA a sawi leh kan Assembly Speaker-in a sawite hi independent hrim hrim sawina, pawl behchhan nei lo hrim hrim sawina a ni," a ti a; tuna ZPM MLA-te nen chuan an dinhmun a inang lo tih a sawi.
Lalduhoma chuan, independent dik tak chu pawl behchhan nei loin anmahniin an ding mai tih sawiin, "Keini chu independent satliah kan ni lo, pawl angin manifesto kan nei. Symbol inang tlang kan nei a, independent tak takte chu symbol a inang thei lo," a ti a; MLA inthlan dawnah ZPM-a rinawm taka awm turin thu an tiam tih sawiin, "Rinawm taka ZPM-a kan awm hian eng dan mah kan bawhchhe lo, min thlangtute kan phatsan lo. Party dangah awm ila chuan dan kan bawhchhia ang," a ti.
ZLP Leader sawi danin, party reng reng a tirah recognised party an ni nghal lo a, an ding phawt a, chumi hnuah Election Commission-ah recognised political party nih an dil ṭhin a; Election Commission-in political party anga a pawm hma pawhin inthlante an chuh ve ṭhin. ZPM pawh chutiang chu an ni.
Tun hmain MNF-in inthlan an chuh danah leh a hnuah political party an nih tak chungchangah te, MPC-a hruaitu pawimawh ni chunga independent MLA 12 an awm tawh dan te, MNF-D MLA awm tawh dante pawh sawi lan a ni. Chu'ngah chuan tumah an inhêk ngai lo.
Lalduhoma chuan, Anti Defection Law bawhchhiat leh bawhchhiat loh thu-ah tun hmain an inchhui ngai loh thu a sawi rualin, tunah erawh chuan ZPM MLA-te chuan chhuitu an nei a nih theih thu a sawi a, "Assembly Speaker hi party thua awm a ni a, min bân an duh pawh a ni mai thei. Min bàn pawh ni se, Court-ah kan kal ang a, defector kan nih loh avangin Court-ah chuan kan hneh tho ang, kan hlau miah lo," a ti.
ZLP Leader chuan, Anti Defection Law an bawhchhiat loh thu te, an lakah Assembly Speaker-in action a la a nih pawhin an hlauh loh thute a sawi rualin, "Ka sawi avangin ZPM-ah nihna kan nei tihna a ni lo, neih pawh ṭul kan ti chuang lo. Hruaitu ṭha tak tak kan nei a ni," a ti a; ZPM-a member nihna neih leh neih loh chungchangah a tlachawpa an kal tur thu a sawi.
Lalduhoma chuan, Jammu & Kashmir (J&K) laka BJP kaihhruai sorkar laipui thil tih dan chuan J&K nihna palzûtna a nih thu sawiin, "J&K thil thleng hi kan chunga thleng ve thei a ni. Hmarchhak state-te hi an khawih ve leh mai ang em, tih kan ngaihtuah thei lo thei lo. Mizoram chungchang sawina Article 371G te, BEFR te, ILR-te hi an ngaih theih loh zingah mi a ni thei. Hindi hi official language a puan an chak hle a, CAB chungchanga an tum dante pawh kan hria a ni," a ti.
BJP-te'n Hindu ram an din duh chuan, Hindu ni ve lote tibuai loin an ramah din mai se tih chu an ngaihdan a nih thu sawiin Duhoma chuan, "Mizoram hi englai mahin Hindu ram a ni ngai lo a, min rawn tibuai kher loin, min chhuahsan mai se," a ti a; India independence laia Mizo hnam aiawhte'n Mizoram awm dan tura thutlukna an siamah, 'India-ah kum 10 chhung kan lo tel ve chhin ang,' tiin condition siamin Mizoram chu India-a lut a nih thu leh India Independence Act-in Mizoram a huam loh thu a sawi.
Central-a BJP sorkar thil tih dan enin, Mizoram leh hnam thilah chuan party dahṭhaa Mizo hnam anga ṭanho an duh thu sawiin Lalduhoma chuan, "A tawp thlengin, kan ral raih thlenga do kan duh. Constitution an pawngsual zel duh a, kan duh loh anga min barh lui dawn a nih chuan, kan theihtawpin kan dodal dawn," a ti. Chutih rualin, tunah lo mangana thlaphân viau tur a nih loh thu sawiin, "Pathian rorel dan tur kan hre lo a, kan ram leh hnam tana ṭha tur zawk pawhin a inher thei a ni," a ti.