Mizoramah ASF a luh lohna atana hmalak dan tur sawiho

AH&Vety minister Dr K Beichhua leh Union for Animal Husbandry & Dairying inbiakna kal zelah, nimin khan AH&Vety department doctor, College of Veterinary Science and Animal Husbandry Selesiha scientist-te leh central 

aṭanga scientist lo kalte'n AH&Vety directorate conference hall-ah Mizorama African Swine Fever (ASF) a luh lohna tura hmalakna hrang hrang an sawiho.

Meeting-a tarlan danin, China leh Asia chhimchhak ram ṭhenkhatah ASF a lên avangin state leh ram páwn aṭanga ran lak luh khap a ni. Khapna thupek bawhchhiain tun hnaia Myanmar aṭanga lo kal nia rinhlelh vawk man a ni te, chu'ng zingah chuan PRRS vei an awm nual avang leh, man tawh sa dah khawm an thi chu sorkar laipuiin a ngaimawh hle a; chuvang chuan sorkar laipui chuan Mizoramah scientist a rawn tír a ni.

Mizorama scientist lo kalte hi National Institute of Veterinary Epidemiology and Disease Informatic Centre (NIVEDI), ICAR, Bengaluru-a mi Dr Sharanagouda Patil leh Dr Jagsdish Hiramath te an ni. ICAR scientist-te hian Selesiha vawk man tawh leh test result chungchangte an enfiah a, postmortem leh sample-te Selesiha man sa dahkhawm aṭangin an la. ASF natna hi Mizoramah a lut a nih chuan, India ram pumpui tan a pawi theih dante an sawifiah a, Mizoram sorkar chu tha thlah loa hma la chhunzawm zel turin an chah a ni.