IMA-in nawrh huaihawt an tum an ṭhulh

Indian Medical Association (IMA) chuan vawiin hian India ram pumah lungawi lohna lantirin, darkar 24 chhung hna an thawh dawn loh thu nimin chhun khan IMA, Mizoram State Branch-in Aizawl Press Club-ah an puang a; an thil phûtte sorkar laipuiin nimin vek khan siam rem a tiam avangin nimin tlai khan nawrh an tum chu ṭhulh a nih thu an puang leh nghal.

Vawiina lungawi lohna lantir tur chungchangah hian IMA Mizoram hruaitute chuan nimin khan Aizawl Press Club-ah thuthar thehdarhtute an kâwm a; an president Dr Rosangluaia chuan, lungawi lohna lantir an tum chhan chu - Medical Council of India (MCI) ṭhiat a, a aiawh tur council dang dinna tur sorkar laipuiin tun hnaia National Medical Council Bill, 2019 a pass vang a nih thu a sawi.

Dr Rosangluaia chuan, National Medical Council (NMC) Bill chu kum 2016 aṭangin IMA-in an dodal ṭan tih sawiin, "A dodalna atana IMA-in India ram pum huapa tih tur a tih ang zawng zawng Mizoramah kan zâwm ve lo a, a chhan chu mipui kan ngaihtuah vang a ni," a ti.

Sorkar laipuiin MCI ṭhiata NMC din a duh chhanah MCI-a eirukna tam lutuk a chhuanlam tih sawiin Dr Rosangluaia chuan, "Mahse, corrupt vangin MCI-a thawktu tumah thubuai siamsak an la awm lo," a ti. Doctor indaih lohna a nasa anga sorkar laipui hotute'n an sawi chungchangah, "MBBS an tam a, sorkarin a ruai ṭha lo zawk a ni," a ti bawk.

NMC Bill-a IMA duh loh laite sawifiahtu IMA Mizoram vice president Dr John Zohming­thanga chuan, "NMC Bill-ah hian mipui tana pawi tur dan siam thar a awm a, doctor zir mekte leh thawk mekte tana pawi tur a awmin kan hria a ni," a ti.

IMA Mizoram chuan nimin tlai khan thuchhuah siamin, "NMC Bill duh loh lantir nana IMA-in ram pum huap nawrh huaihawt a tum chu Central sorkarin IMA duh dan hrang hrang ngaithla a, Bill-a a ṭha lo a tih laite siam rem a intiam avangin IMA chuan strike hi kaltlangpui loh ni se a ti a ni," an ti a;  chutih rualin, NMC Bill chu siamṭhat a nih hma chuan IMA-in hma an la zel dawn tih an tarlang. 

IMA Mizoram vice president Dr John Zohmingthanga sawi danin, NMC Bill chu ṭha lo an ti vek lo a, thil chi li ṭha lo tih an nei. MCI-ah chuan member zinga 50-60% chu doctor-te'n an thlang a, NMC-ah erawh chuan a tam zawk sorkarin a ruat dawn a, chu chu an duh loh zinga mi a ni.

1.    Section 32: Modern medicine zir ve lo, damlo enkawl kawnga inhmang ve thote chu thla ruk chhung training an zawh hnuah medicine practice phalna licence pek a ni dawn. Medical doctor (MBBS)-te'n damlo enkawl thei turin kum 5 an zir a, chumi hnuah registration nei turin kum khat dang internship an ti leh a; chutiang paltlang ve lote thla 6 leh training hnua doctor anga damlo en theihna licence pek ṭha an ti lo. Doctor lem tipungtu turah an ngai a, mipui (damlo) tan pawh a him dawn lo-ah an ngai.

2.    Section 50 & 51: Modern medicine ni lo, zir dan danga damlo enkawlna zirte'n modern medicine practice thei turin short course training an neih dan kawng a hawng dawn. Thiamna tak tak nei si loa damlo inenkawltirna tur a nih avangin an duh lo.

3.    Section 15: Tuna kal dan tlangpuiah, MBBS zirlaite'n final exam an pass hnuah internship an ti phawt a, chumi hnuah post graduate course zir leh duh tan entrance exam a awm hrang leh a, NEET post graduate an ti. NMC Bill-ah erawh chuan, National EXIT Test a awm dawn a, chutah chuan MBBS final exam leh internship zawh hnua practise phalna licence bakah, NEET post graduate-te khung khawm a ni dawn. Chu chu medical zirlaite tana pawi hle turah an ngai.

4.    Medical college-a seat awmte chu sorkarin 85% vel a hauh a, 15% dang NRI quota chu medical college-in an duh angin an kalpui ṭhin. Sum seng deuha zir duhte pek a ni fo. NMC Bill-ah erawh chuan, sorkar quota 85% chu 50%-ah tihhniam a ni dawn a, NRI quota tih ṭhin, medical college-in an duh anga an kalpui ṭhin 15% ni ṭhin chu 50%-ah a pung dawn. Hei hian medical college leh MBBS seat chu sumdawnna lian takah a chantir turah an ngai a ni.