Saitual DC leh SP lawmna hun buatsaih

Mizoram sorkarin tun hnaia a dah, Saitual DC thar C Lalpeksanga leh SP thar C Lalduhthlanga te lawmna hun nimin khan Keifang leh Saitualah buatsaih a ni. He hun hmanpuitu bialtu MLA R Lalzirliana, minister chuan, chief minister Zoramthanga leh a thawhpuite zarah Saitual district tihpuitlin a nih thu a sawi.

R Lalzirliana chuan, Congress party hruaitute zingah amah ûm hlum tum an awm tih sawiin, "Mahse, Pu Zoramthanga leh a hote'n min âwi nung a, Home minister ka nihna bànsanin ka péng a ni. MNF party candidate ka nih chhan chu Pu Hawla ka huat vang a ni lo a, Saitual district puitlin theihna atan a ni. Pu Zoramthanga chungah lawmthu kan sawi tur a ni," a ti.

August 9, 2019 hian Council of Minister ṭhutkhawmnaah district ramri tur an sawi dawn tih sawiin R Lalzirliana chuan, "A huam chin khaw mipuite pawh kan duh angin boundary a awm lo a nih pawhin lung loa lak tur a awm lo," a ti a; Saitual district chu tê tak a nih loh tur thu a sawi.

Saitual DC C Lalpeksanga pawhin thu sawiin, "District thar enkawl hi deputy commissioner kut chauh a ni lo a, district mipuite'n chanvo pawimawh tak an neih ṭheuh. District zingah chuan boundary nei ṭha ber pawl, district boundary rálmuang tak nei kan nih dawn avangin kan vannei hle a ni," a ti a; district hmasawnna atana hmalakna kawng hrang hrangah sorkar ṭha taka thawhpui ṭhin turin mipuite a ngen.

Saitual SP PC Lalduhthlanga chuan, Saitual chu district tharte zingah rálmuang ber leh dan leh thupek zâwm ṭha ber district a nih theih nan a bul aṭanga thâ thlah loa ṭan la tlang tur leh, thawhhona ṭha neihpui turin Saitual district mipui a sáwm.

Saitual DC leh SP thar lawm inkhawm neih zawhah Saitual District Implementing Demand Committee chu ṭhiah nghal a ni. Saitual hian district an dilna hmasawn ber chu kum 1974-ah an thehlut tawh a ni.