KHAWTHLIR

Lawngtlai DC Shashanka Ala chuan August 6, Thawhlehni khan an district-a Hruitezawl khua a tlawh a, District Rural Development Agency (DRDA)-in Pradhan Mantri Krishi Sinchayee Yojana (PMKSY) hnuaia kut hnathawktute thar chhuah tipung tura hmalakna an kalpui mek a enfiah. DC hian kuhva leh thlai dang chîng tura thlante bul a ṭanpui a, bul ṭanpui nan kuhva leh ser (Assam lemon) ṭiak a phun a ni.

Mizoram sorkar chuan thuchhuah siam­in, Mizoram House, Old Ballygunge Road, Kolkata-a mi chu sak ṭhat a nih dawn avang­in August 1, 2019 aṭangin thlen theih a nih dawn loh thu a tarlang a, "Ballygunge House bikah hian mikhual a thlen theih tawh loh tih mipuite hriattir an ni," a ti. Kolkata-a Mizoram sorkara Additional Resident Commissioner office chu Flat No. 1C, Singhi Castle Building, 9/3A, Leela Roy Sarani, Gariahat Road, Kolkata 700019-ah sawn a ni.

Dampa bialtu MLA Lalrintluanga Sailo chuan August 6, Thawhlehni khan a bial chhung Marpara-a Mizoram Rural Bank branch office leh staff quarters turte a enfiah. MRB Marpara Branch atan hian mimal in luah phawt tura rua­hman a ni a, a bul hnaiah staff quarters tur leh security guard awmna tur ruahman a ni.

SCERT (Special Education Cell) chuan nimin khan SCERT directorate auditorium-ah SSA hnuaia resource teacher, resource person leh inclusive incharge-te tan Rights of Persons with Disabilities Act, 2016 zirhona an buatsaih a, SCERT director Laldawngliani Chawngthu-in a hawng. Training hian August 9, 2019 thleng a awh dawn a ni.

Aizawl mayor PC Lalhmingthanga chuan T Romana College chu nimin khan Plastic Free Campus-ah a puang. Plastic Free Campus puanna inkhawm hi college tualah neih a ni a, Mayor bakah deputy mayor Lalringliana leh councillor palite'n an hmanpui. T Romana College hian plastic aṭanga siam, vawi khat chiah hman chi (single use / disposable)-te chu an campus chhungah lak luh leh hman an phal tawh dawn lo a ni.