MLA fund 1st instalment-ah cheng nuai 75 beisei laiin cheng nuai 33 chiah an hmu thei

ZPM Legislature Party (ZLP) secretary Dr Vanlalthlana chuan, Mizoram MLA-te'n MLA fund first instalment-ah cheng nuai 75 hmuh an inbeisei laiin, cheng nuai 33 ṭheuh chauh an hmuh thu sawiin, Mizoram sorkarin sum a nei lo ṭan viau nia a lan thu a sawi.

ZPM MLA-te'n nimina Aizawl Press Club-a thuthar thehdarhtute an kawmnaah Dr Vanlalthlana chuan, MLA fund chu financial year khat atan ṭum hnih (two instalment) pek chhuah ṭhin a nih thu sawiin, "MLA fund hi cheng nuai 150 aṭangin a zatve, nuai 75-in vawi hnih pek chhuah tura ngaih a ni a, first instalment-ah pawh nuai 75 kan beisei a, mahse, nuai 33 chiah a rawn kal a ni," a ti.

Dr Vanlalthlana chuan, Mizoram Chief Minister-in sorkar laipuiah hmarchhak state-te tan sum a tam thu a sawi ṭhin tih sawiin, "Session zawh tâkah pawh a sawi nasa a, mahse, a pakla hisâpin a sawi mai niin a lang," a ti a; sum awm zatte chu awlsam taka hmuh theih a nih avangin, Chief Minister chuan data dik ring ve se, thu dik sawi ṭhin se, a tak ramah awm ve tawh se an duh thu a sawi. Kum 2017-18 central budget-ah hmarchhak state tan sum tam tak dah a ni a, mahse, hmarchhak stage-te'n an hmang hlawm lo tih a sawi bawk.

ZLP Secretary chuan, India rama chhiarpui record enin, Mizoramah Chakma-te punna a sang bik hle tih sawiin, Chakma-te'n Mizoram mi dik tak nihna lantir thei document pawimawh an neih zel theih dan hriat an châk thu a sawi a, "Chakma-te hi kan haw lo a, kan duh loh chu dan loa Chakma foreigner awmte hi a ni. ZPM chuan theihtawpin Chakma foreigner dodalin hma kan la dawn," a ti.

Dr Vanlalthlana chuan, Chakma-te chungchanga MNF kaihhruai Mizoram sorkar hmalak dan chu beiseina sang tak nen an thlir reng dawn tih sawiin, "An vote duh vanga Chakma-te duhsakna awm ṭhin hi awm tawh lo se kan duh," a ti a; Chakma foreigner zawn chhuahna tura Central YLA-in CADC chhunga Local Area Population Census 2019 an kalpui chu ZPM-in an thlàwp thu a sawi bawk.