Dy. CM-in tui bill pekna a tlangzarh

PHE department chang­tu deputy chief minister Tawnluia chuan nimin khan a chenna inah Chawnpui Veng, Aizawla tui bill pekna thar, Mobile Point of Sale (MPoS) a tlangzarh.

Tawnluia chuan, mipuite tan awlsam zawka tui bill pekna MPoS hman theih a ni ta chu lawmawm a tih thu sawiin, "Phone hmangin emaw, ATM card leh cheque hmangin emaw awlsam taka pek theihna tur ruahmanna thar PHE-in a siam hi mipui leh sorkar tan zângkhaina leh awlsamna tam tak siamtu a ni," a ti a; khawl thar hmangin Aizawl khawpuiah tui bill awlsam tak leh rang takin a pek zung zung theih tawh tur thu a sawi.

PHE secretary Amjad Tak pawhin thu sawiin, India ram state lian zawk ṭhenkhatte pawhin an la kalpui theih loh digitisation Mizoram PHE-in a kalpui thei chu lawmawm a tih thu a sawi a, "MPoS hi ṭangkai taka mipuiin an hman ngei ka beisei," a ti.

PHE department hian HDFC Bank nen thawkhoin mipuiin awlsam taka tui bill an pek theihna MPoS an siam a, hman man awm loin HDFC hian heng khawlte hi PHE a hmantir a ni. MPoS hmang hian kan thil leina man ATM card hmanga pek ṭhin ang hian tui bill a pek theih tawh dawn a, cheque pawh hman theih a ni a, pawisa faia pe duh tan pawh pek chhunzawm theih a ni.