Corporation-te din thar leh kan tum - Dr R Lalthangliana

Nimin khan Aijal Club-ah 'National Handloom Day' vawi ngana lawm a ni a; khuallian Dr R Lalthangliana, Commerce & Industries minister chuan, corporation-te din thar leh an tum thu a sawi.

Dr R Lalthangliana chuan, corpora­tion zingah mumal taka kal an awm tawh loh thu sawiin, "ZOHANDCO, ZIDCO leh KVIC-te chu fûke kima kal turin bul kan ṭan leh chauh a, MIFCO pawh a pawimawh tehreng nen, a lo thi lek lek hman a, tunah thawktu 20 vel awm chê chêin, din thar leh kan tum. Corporation-te ṭha taka din thar leh tur hian, hun la duh deuh mah se, kan ennawn leh vek dawn a ni," a ti.

Sorkar aṭanga ṭanpuina la pek loh handloom lama thawkte chungah lawmthu sawiin Commerce & Industries Minister chuan, "In tan sorkarin a tih theih ang tawkah ṭan a la zel dawn. Handloom hi kan eizawnna atan Pathian min pek a ni," a ti a; handloom chu eizawnna ngêlnghet nei lo mi tam takte dinchhuahna tur a nih thu a sawi.

Dr R Lalthangliana chuan, Mizote'n sum leh pai an sên tamna ber pakhat chu thawmhnaw a nih thu sawiin, "Foreign leh phai lam thawmhnaw hnâwlin mahni hnam thuam i ngaihlu ang u. Nilaini apiangin Mizo thuama inthuam tur tih sorkar thar chuan kan puang tawh a, la hre lote pawhin i hre nawn ang u. Kan Mizona lai tak hi hnam dang lakah pawh Mizote kan hlutna a ni," a ti.

ZOHANDCO chairman C Lalram­mawia pawhin thu sawiin, "Handloom tihhmasawnna tura puan tahtu hrang hrangte hian kan tah chhuah a tam zel theih nan tih tak takna, teirei peihna, tuina leh a ṭhatnaah ṭang deuh deuh ang u,"  a ti a, Mizo thuam hrang hrangte chu zah tur a nih thu a sawi.