Meet the Heroes: Peace Pay buatsaih
Tourism department chuan Mizoram buai laia ralthuam laa China-a kea kalte chawimawina hun 'Meet the Heroes: Peace Pay' nimin khan Vanapa Hall-ah an buatsaih a; khuallian chief minister Zoramthanga chuan, MNF-te'n zalenna an sual lo tih chi a nih tawh loh thu a sawi.
Inkhawm hi Tourism minister Robert Romawi Royte-in a kaihruai a; Zoramthanga chuan, Subhash Chandra Bose kaihhruai Indian National Army-te chu a hun lai chuan British hoin misual leh helho titein an sawi ṭhin tih sawiin, "India independence hnuah chuan mi huaisen an ti a, chawimawina tinréng an pe a ni," a ti.
MNF President chuan, hmânah chuan MNF-te hming chu a chhe tinrenga vuah a nih thu sawiin, "Hel, dan pawisa lote min ti. Tunah chuan hun a kal a, India sorkar ngeiin sum rawn sanction in, Meet the Heroes buatsaih a ni," a ti a; misual an tih ṭhin chawimawina atan India sorkar chuan sum a thawh thu a sawi.
CM Zoramthanga chuan, MNF-te chu zalenna an sual lo tih chi a ni tawh lo nia sawiin, "Ṭhangtharte'n ram leh hnam tana pasalṭhate an ti tlat tawh. Ram leh hnam tana kan beihna, Pathian leh kan ram tana kan tihna khan tunah pawh min kokhawm a ni. Ram leh hnam tana zalenna kan sual kha chhuan tur kan neih chhun a ni," a ti.
Khualzahawm Tawnluia, deputy chief minister chu inkhawmah a tel theih loh avangin, he ni puala thuchah a sawi chu tih chhuah a ni a; Tawnluia chuan, China-a ralthuam latute chu chawimawi an phû thu a sawi. Tawnluia chuan, Pathianin Mizote chu hnam pakhatah a siam thu sawiin, "Kan dikna chanvo dik tak nei turin Pu Laldenga kaihhruaina hnuaiah min awpbetu lakah independent puangin kan rammû a ni. Kan hnam dikna leh chanvo nei turin MNF chuan a bei zel dawn," a ti.
MNF Senior Vice President chuan, hnam sipaite'n zalenna sualin theihtawp an chhuah tih sawiin, "Zoram mipuite ngenna angin inremna thuthlung siam a ni," a ti a; remna ṭha tak hnuaia hmasawnna lama ke pên theia Mizoram a awm chu lawmawm a tih thu a sawi.
Inkhawmah hian China rama kal (delegation) aiawhin Thangruma leh contingent aiawhin Lalhmingthanga ten thu an sawi. Thangruma chuan, hmelma karah an thi dawn nge, an dam dawn tih hre loin an rammû tih sawiin, "Kan ṭhiante tam takin mual min liamsan a ni," a ti.
Thangruma chuan, an team China-a kalte chu a tirah chuan mi 40 an nih thu sawiin, "Inkahnaah pakhat a thi a, pakhat an man. China kal thleng chu mi 38 kan ni. Kan huaisen ber lo a, kan ṭha ber lo. Hotute tirh vanga kal kan ni," a ti a; anni lo pawh hnam sipai zingah China-a kal hreh lo eng emaw zat an awm thu a sawi.
Nimina chawimawina an hlante hi China-a kea kal turte tana kawng lo sâttu mi pali te, a thawh khatnaa kal mi 40 leh a thawh hnihnaa kal mi 108-te an ni a, an vaiin mi 144 an ni.