National Deworming Day hman a ni

Nimin khan Mizoram hmun hrang hrangah National Deworming Day (NDD) hman a ni a, naupangte hnenah rûlhût hlo pekna tur programme hawn a ni. Aizawlah chuan Chaltlang Higher Secondary School-ah hman a ni a, Health minister Dr R Lalthangliana'n a hmanpui.

Aizawla NDD hmanna inkhawm chu NHM mission director Dr Eric Zomawia'n a kaihruai a; minister Dr R Lalthangliana chuan, zirlai naupangte chu an nun uluka fimkhur tur leh an hriselna enkawl uluk turin a chah a, "Taksa hrisel nei turin mahni inthununna neih a pawimawh. Eng ang pawhin lehkha thiam thei mah ila, taksa a hrisel loh chuan a nuam chuang lo a, dam reina hi a pawimawh ber a ni," a ti.

Health Minister chuan, zing ni chhuak hmu ngai lo leh zan lama mut nachang hre lo ṭhalai tam tak an awm tawh tih sawiin, chutiang nun chuan hriselna kawngah nghawng ṭha lo a nei thei thu a sawi a, "Dam reina kawngah nu leh pate hian mawhphurhna nei viau mah se, a tawpa pawimawh ber chu mahni kan ni," a ti a; zirlaite chu an hrilselna ngai pawimawh turin a chah.

Minister hian rûlhût hlo (Alben­dazole) chu zirlaite a eitir a, chumi hnuah Chaltlang HSS zirlai 700 chuangin damdawi an ei nghal. NDD puala damdawi ei hman lote tan August 16, 2019-ah Mop-Up Day hman a ni dawn a, damdawi pek leh tum a ni. 

Inkhawmah hian Dr Lily Chhakchhuak-in NDD chungchang a sawifiah a; Health principal director Dr F Lallianhlira'n thu a sawi bawk. Rúlhût hlo Albendazole hi naupang kum 1-19 inkarte hnenah pek tur a ni a; nimina NDD-ah hian anganwadi worker leh ASHA-te'n sikul leh anganwadi hrang hrangah naupangte an pe a ni. NDD hi kum 2016 aṭangin India ramah hman ṭan a ni a, kum khatah vawi hnih - February leh August-ah hman a ni ṭhin.

NDD hi Lungleiah chuan Southern Flower School-ah hman a ni a, chief medical officer Dr Thani Pachuau-in a hmanpui. Senior medical officer Dr Lalrinthangi'n thu sawiin, naupang kum 1-19 inkar zawng zawngte a thlâwnin rûlhût hlo pek vek a nih tur thu a sawi a, "Sikula kalte chuan an sikulah ei tur a ni dawn a, sikul kal lote tan anganwadi-ah ei tur a ni ang," a ti.

Dr Lalrinthangi sawi danin, sikul leh anganwadi-a ei ve thei lote tan August 16, 2019-a Mop-Up Day-ah eitir ngei tura ruahman a ni a; Lunglei district pumah naupang kum 1-19 inkar 50,667 pek tum a ni. Kolasib-ah pawh NDD hi Kolasib High School-ah hman a ni a; senior medical officer Dr RK Lalthlamuana chuan, Deworming Day chu India ramah kum 2016 aṭangin kum khatah vawi hnih hman ṭhin a nih thu leh, kuminah chuan February thlaah pawh hman a nih tawh thu a sawi.

Lawngtlaiah pawh NDD hi Chandmary Venga Ngurnunsangi English School-ah hman a ni a, Lawngtlai chief medical officer Dr Lalthlamuana'n a hawng. Hawnna inkhawm zawhah zirlai naupangte hnenah damdawi pek nghal a ni.