Petrol pawlh dal Addl DC thuin zuar - MCU

Legal Metrology enforcement duty-te'n MIZOFED petrol pump, Aizawla petrol (extra premium) dah tur an enfiahnaah pawlh dal a ni ngei tih an finfiah chu Aizawl Additional DC-in petrol pawlh dal chin chu ngaihdam theih chin a ni, tiin a chhuah zalen tih Mizoram Consumers Union (MCU) chuan an sawi a; Addl. DC thil tih dan chu an dem thu, thuchhuah siamin an tarlang.

MCU tarlan danin, June 21, 2019 khan petrol (XP) phur tanker MZ-05 3804, Saju Ahmad Laskar s/o HU Uddin, Dhoni Hari, Cachar khalh chu MIZOFED Petrol Pump-a dah luh a nih hmain Legal Metrology enforcement-in an enfiah a; petrol tak dan (density) tehnaah +3 leh -3 inkar chin chu hralh chhuah atana ṭha tawka ngaih a nih laiin, tanker MZ-05 3804-in a phurh petrol density chu +3.0 aia sang, +3.3 a ni.

Tanker MZ-05 3804-in petrol pawlh dal chungchangah hian dan anga action la turin Legal Metrology-te chuan DC hnenah ziakin an thlen a; mahse, DC aiawhtu Addl. DC John LT Sanga chuan petrol chu ngaihdam theih chin a ni, tiin action a la lo a, a phurtu chu a chhuah zalen a ni.

Additional DC thil tih dan chu hriatthiam har an tih thu sawiin MCU chuan, "Petrol pawlh dal man hi DC phalnain MIZOFED petrol pump-ah unload a ni a, hralh zawh vek a ni bawk. A tuartu chu mipui mimir an nih leh tho avangin a rilru nat thlak kan ti hle a ni. Mizoramah petrol teh tling leh pawlh dal loh hman theih hlan kan nghahhlelh em em laia a changtu department-te'n a an man sa ngei, a dik lo a ni tih an finfiah sa ngeiah pawh Addl. DC-in action la loa a sezáwl chhuah mai hi  kan dem tak zet a ni," an ti.

MCU chuan, tun hnuah chuan mimal induhsakna emaw, inhriatthiamna emaw ang chi chu dan bawhchhiate chungah thleng tawh lo se, dan ang taka thil tisualtute lakah hremna lekkawh zel ni se an duh thu an 

tarlang bawk.