Thawktu 5 ban an nih vangin Exam kalpui theih a ni lo

ICFAI University Mizoram Employees Forum (UMEF) chuan nimin khan Aizawl Press Club-ah thuthar thehdarhtute an kawm a; ICFAI University, Mizorama thawkte zinga mi panga bân an nih avangin exam lai mek tihtawp a ngaih thu an sawi.

ICFAI UMEF hruaitu Timothy Hnamte chuan, ICFAI University Mizoram chu The ICFAI Society, Hyderabad (not-for-profit organisation in ti) sponsor-na hnuaiah Mizoram State Legislative Assembly-in ‘The Chartered Financial Analysts of India University Mizoram Act, 2006’ pass-a din a nih thu a sawi a, "Act, rules, statutes leh administrative manual-a awm tam takte vawiin thlenga an tihhlawhtlin theih loh avangin zirlaite leh thawktute'n harsatna hrang hrang kan tâwk a ni," a ti.

Harsatna hrang hrang thuneitute hnena an thlen ṭhinah chhànna mumal dawng lo chung leh ngaihsak an nih loh chungin, zirlaite'n buaina an tawh lohna turin thawktute'n exam an buatsaih a, result pawh an chhuah vek tih sawiin ICFAI UMEF hruaitute chuan, "Thawktute'n May 2019 aṭanga hlawh kan lak tawh loh hnuah pawh supplementary exam chu July 29 aṭanga August 2, 2019 chhunga neih turin kan kalpui a ni," an ti a; session thar pawh pangngai taka kalpui kan tum mek laiin July 30, 2019 khan teaching staff pangain bànna lehkha email-a an dawn thu an sawi.

ICFAI UMEF tarlan danin, zirtirtu bàn zingah hian Campus Head (Academic head) leh Dy. Controller of Examinations (Examination Dept. head)-te an tel avangin supplementary exam neih lai mek chu loh theih loin tihtawp a ngai. Zirlaite an khaihlak loha mumal taka class an kal chhunzawm theih nan leh supplementary exam pawh an zawh ngei theihna turin, thawktute chuan thawktu bân tâkte chu lak let leh, hlawh la pek loh zawng zawng pek an phût a ni. 

The Chartered Financial Analysts of India University Mizoram Act, 2006-ah hian 'Headquarter chu Aizawlah a awm ang' tia tarlan a nih laiin, ICFAI Society hian Hyderabad headquarter-a hmangin a enkawl a, Mizorama zirlaite sum leh pai zawng zawng pawh Hyderabad-ah a lut vek ṭhin. ICFAI Society aiawhin C Dothanga, IPS Rtd. (Advisor to The ICFAI Society leh acting V/C), Joseph Lalremsanga (Registrar) leh David Lawmzuala (Asst. Registrar)-te Aizawlah an awm.

ICFAI Society aiawha Mizorama awmte chu an harsatna sutkianna kawnga hma la tura an beisei em em laiin, ICFAI Society-te hmanruaah chauh an ṭan thu nia sawiin ICFAI UMEF chuan, "Mimal hming thur chhuaka hetiang inbànna thawktute chunga a thleng ta hi pawi kan tiin ná kan ti hle. Thawktute leh zirlaite chuan hetianga ICFAI Society-te kut leh kea ṭang a, hmanrua keimahni zinga an awm hi pawi kan tiin ṭha kan ti lo a, reinstatement leh hlawhte mumala lak theih a nih hma chu hna pawh thawk chhunzawm bik lo tura ngenin, August 6, 2019 khan an office kan kalhsak a ni," an ti.

n    Quality education aiin sum leh pai hai luhna an ngai pawimawh zawk.

n    Class room an indaih lo a, zirlaite'n classroom an inhman chhâwk a ngai.

n    Library a changtlung lo a, zirlaite tana lehkhabu ràwn tlak a tlem.

n    Zirlai fee-te a khát tâwka tihsan reng a ni a, zirlai tam tak tan phurrit a tling. Fee sang phûin zirlaite mamawh infrastructure an tichangtlung duh lo thung.

n    Hostel a awm lo, sak tuma ruahmanna pawh a awm lo.

n    PwD (rualbanlo) zirlai an nei ve reng a, ramp a awm lo a, lift a awm lo bawk.

n    Thawktute tan career advancement scheme siam a ni lo.

n    Laboratory mumal a awm lo.

n    Act-in a tiam sport facility a awm lo.