KHAWTHLIR

Electoral roll ennawnna, Special Summary Revision of Electoral Roll nei tura inpuahchahna kal mekah nimin khan Kolasib-a IPR Confe­rence Hall-ah district chhunga booth level officer (BLO)-te tan training buatsaih a ni. Training-ah hian Kolasib district election officer Zoengsanga, bawrhsap chuan BLO-te mawhphurhna leh fuihna thu a sawi.

J Thankima College NSS unit chuan nimin khan an college-ah blood donation camp an huaihawt a, mipa 101 leh hmei­chhia 16-te'n Aizawl Civil Hospital tan thisen unit 117 an pe. Lung­lei Higher Secondary School NSS unit pawhin nimin khan an sikulah Lunglei Civil Hospital tan thisen unit 57 an pe a, a petute mipa 46 leh hmeichhia 11 an ni.

Environment, Forests & Climate Change (EFCC) department-a officer-te chuan nimin khan PCCF Conference Hall-ah review meeting an nei a, EFCC minister TJ Lalnuntluanga'n a hmanpui. Department hmalakna kawnga hlawhtlinna leh harsatna an tawh dan te, hmalak zel dan turte an sawiho a, All India Forest Sports Meet neih zawh taka medal latute chawimawina hun an hmang nghal bawk.

MZP Sub-Headquarters, Phuldungsei chuan nimin khan an khaw community hall-ah an khua aṭanga exam chi hrang hranga pass-te chawimawina hun an hmang a, bial­tu MLA Lalrintluanga Sailo, govt. deputy chief whip-in a hmanpui. Chawimawina hun­ah hian graduate leh post graduate course zo thar mi 18 hnenah chawimawina thuchei an hlan a ni.

Mara Autonomous District Council-a MDC hlui Mylai Hlychho chuan Chief Minister's Relief Fund-ah Rs. 10,000 a chhûng lut.

Mizoram State Commission for Women chairperson Lallawmchhungi chuan thuchhuah siamin tunhnaia Suangpuilawna hmeichhia rawng taka thah a ni chu a dem thu leh pawi a tihzia a tarlang a, "Hmeichhe chak lo leh awmnem zawk hetianga rawng taka thah a ni hi pawi ka tiin, ka dem takzet," a ti.