Lunglei MSU-in August 2019 chhunga Tuichawngchhuah chhuahsan turin hriattir

MSU Regional Headquarters, Lunglei hruaitute chuan, tun dinhmunah dan loa khaw din (unauthorised village) 12 a awm mek tih an sawi a; dan loa khaw din zinga mi Tui­chawngchhuah khuaa mite chu August 2019 chhung ngeia khua chhuahsan turin an hriattir.

Lunglei MSU hruaitute hian nimin khan Lungleiah thuthar thehdarhtute an kâwm a, dan loa khaw din leh Tuichawngchhuah chungchanga an hmalak dan leh hmalak zel dan tur an sawifiah. MSU hruaitute chuan, dan loa khaw din Tuichawngchhuah khuaa chêng Chakma-te chu an duh thlanna hmun Forest reserve area-a dan bawhchhe leh tura awm tum loin, Tuichawngah inbêngbel turin an hriattir a, "Tuichawngchhuah Chakma-te chu hun tiam chhunga inthiar chhuak turin kan beisei a, hun tiam August thla chhung ngeia an inthiar chhuak lo a nih chuan MSU chuan kut a sil tawh ang a, an chungah eng pawh thleng se, an sawi buai thei lo ang," an ti.

Chakma dan bawhchhetu ni si, dan bawhchhe lo ang maia ram leilung fate zahna leh duh dan pawisa loa an khawsak reng chu an remti lo tih sawiin Lunglei MSU hruaitute chuan, "Dan loa lo pêm lut Chakma-te'n Mizo chîmral min tumna leh kan ram min chuhpui mai duh tâwk lo a, ram neitu nihna hiala an inchhál hi kan hrethiam thei lo," an ti a; Chakma-te an duhna hmun taka an awm theih nana sorkar department ṭhenkhatin theihtawp an chhuahpui chu hriatthiam har an tih thu an sawi.

Lunglei MSU chuan, Lunglei mipui te, Lunglei district leh Mizorama Mizo tawh phawt chu dan loa khaw din leh Tui­chawngchhuah chungchanga an hmalakna thláwp turin an sáwm a, "Kan ram, kan humhalh nan leh chîmralna lak ata kan hnam venhimna a ni tih hriaa min ṭawiawmna kan dil tak meuh meuh. Hnam thil hi pawl leh mimal hamṭhat nan hman chi a ni lo tih hria a, he thilah hian hnam anga kan thawhho kan duh a ni," an ti.

Tuichawngchhuah chung-changah hian April 1, 2019 khan Lunglei DC pisaah resolution siam a ni a, district bawrhsap K Lalrinzuali, Lunglei Sub-Hqrs. YMA president Lalrotluanga leh MSU Gen.Hqrs. president Vanlalliana Khiangte ten hming an ziak.

Resolution thu chu, "LAD, Govt, of Mizoram hian April 2, 2019 hian Tuichawng­chhuah illegal settlement chungchanga eviction kalpui tura hmalakna hi chak zawka a kal theih nan Screening Committee, Chief Seretary, Govt. of Mizoram chairman-na hnuaiah ngaihtuah ngei rawh se," tih a ni.