Mizorama ar vulh ngei lei turin ngen

Ar vulhtu intêlkhawm pawl, All Mizoram Poultry Farmer Association (AMPFA) chuan nimin khan Aizawl Press Club-ah thuthar thehdarhtute an kâwm a, Mizoram chhunga vulh ngei arsa lei turin Mizo mipui an ngen.

AMPFA general sec­retary Zohmingliana chuan, ar vulh chu chhung­kaw eng emaw zatin eizawnna bulpui berah an hman mek laiin, tunlai hian harsatna naménlo an tâwk tih a sawi a, "Tunlai hian kan ṭhenawm state, a bikin Assam ár tute'n emaw la lutin, puah sa Mizoram hmun hrang hrangah an thawn darh ṭhin. Heng ár puah sate hi sa hrisel leh thianghlim a nih leh nih loh hriat a ni lo," a ti.

Assam aṭanga lak luh arte chu tualchhunga ar vulhtute ár ai chuan a thar ṭha tâwk lo hle tih sawiin Zohmingliana chuan, "Vawiina zawrh tur ang hi nimin lama talh leh puah a ni ṭhin a, chuvang chuan a tharlám tâwk lo tih mipuite'n kan hriat a pawimawh tak zet," a ti a; a nung chunga phai ar lian rawn lut ṭhinte'n natna chi hrang hrang an put luh ṭhin thu a sawi.

AMPFA hruaitute chuan, "Ar puah tur Assam aṭanga an rawn la lut thei reng hi pawi kan ti tak zet. He kan harsatna tawh hi sorkar hian min hriatpuiin hma min laksak vat se. Mi ṭhenkhat, ar vulh lêm lo, puah atana Assam aṭanga ar la lut ṭhinte avangin Mizorama ar vulhtute dinhmun a him lo a ni," an ti.

AMPFA chuan, "Tualchhung ár min leisak hian ár vulhtute min ṭanpui a, lei rem kan rah ve theih nan rahbi pawimawh tak min tuksak a ni," an ti a; Mizoram chhung ngeia an vulh arsate chu hnam rilru pu chunga leisak 

ṭhin turin Mizoram mipui an ngen a ni.